حكايات كثيرة نسمع عنها ويتوارثها الأجيال وحتى وقتنا هذا.. ونسمع عن ما يسمونه بخروج أرواح التوأم ليلا لوحدها سارحة أو على هيئة قطط وبالأخص فى الصعيد، فظاهرة تحول التوأم إلى قطط بالليل أثارت جدلاً واسعاً وتطوى الكثير من علامات الاستفهام والغموض!!.. فالمعروف أن الصعيد ملىء بالأسرار والخبايا.
ويقول أحد بائعى الجمال بشوق برقاش الذى يعد أكبر سوق لبيع الجمال فى العالم، ويدعى "محمد"، "لبن الجمال مفيد جدا خاصة للتوائم.. وعندنا فى الصعيد الأمهات بتسقى أطفالها الرضع لبن جمال بعد الولادة مباشرة عشان روح الطفل تتقل وتثبت فى مكانها".
واستكمل، "الأرواح بتاعت التوأم لأنها تعتبر روح واحدة نبتت منها جسدين بتسرح وأحيانا تتحول الروح إلى قطط ليلا وبتطلع من الجسد وتسرح وتروح ناحية روائح اللحوم والأسماك والطيور والجسم بيكون موجود فى مكانه.. عشان كده الستات فى الصعيد تسقى أطفالها التوأم لبن الإبل عشان الروح تتقل ومتسرحش".
وأوضح الحاج زين وهو أقدم بائع جمال فى سوق برقاش، "أن الاتنين المولودين توأم لما يشربوا لبن الجمال ميتحولوش لقطط ولو مشربوش لبن الجمل أرواحهم تسرح وتروح ناحية أى حاجة فيها لحوم".
واستكمل، "لازم الست تسقى عيالها التوأم لمدة شهر يوميا لبن جمال.. والروح أحيانا لم تخرج وتروح عند بيت مقابل فيه لحوم واتقفل على الروح بدون قصد فهذه الروح تشتكى إلى والده أو ولدته وتقول له فى المنام فلان حبسنى عشان كده احنا هنا فى الصعيد عارفين أن لبن الجمال ده شفاء من عند ربنا".
