وصباح الفل أما يشقشق
والندى ع الورد يقوم ينطق
وستاير ليلى المشدودة
وايدين الشمس الممدودة
ترخيلى الحبل على الغارب
تفتح لى الأمل المتوارب
ع البحرى تفتح لى طريقها
ادخلنى افتش زواريقها
ف صباح الفل أما يشقشق
والندى ع الورد يقوم ينطق
والورد يهفهف ويفتح
أحلامى العطلانة تصحصح
اسكنى يا روايحه ف نغاشيشي
وتبطل تنطق لى ما فيشي
والجيب المشهر إفلاسه
ه يدوب من ريحته واحساسه
ف صباح الفل اما يشقشق
والندى ع الورد يقوم ينطق
تجريلى الميه فى قنواتى
والسعد اما يواتى يواتى
والأعمى ه يفتح لى ساعاتى
والليل ه يليل بناياتى
والعين هتصحصح بآهاتى
ف صباح الفل أما يشقشق
والندى ع الورد يقوم ينطق
تم أضافة تعليقك سوف يظهر بعد المراجعة