أول أعراض الشيخوخة
لما الأحلام تدبل وتموت
وتفوت أيامنا المعدوده
زي الدوده تنخر ف سكوت
وتعيش هلفوت
من غير غايه
و مرايه تشوف نفسك سلطان
طب ليه زعلان
أو ليه فرحان
ما الكل سيان
وحقيقتك دايماً
مداريها
بين النسيان
علطول حيران
ف الدنيا الضيقه
و الواسعه
مجموع تسعه
زائد تسعه تتلخبط فيه
و تصلّح ليه
دا الحسبة ماهيش باللوغاريتمات
لو واحد مات و ما تعرفهوش
هتفوت و تروح و ما تدفنهوش
الواجب واجب مهماً كان
لو بالإمكان تقدر تخدم
هتشيله صحيح و لا هتنساه
كام واحد تاه
قبلك ولا جاش
خطفاه من بينا النداهه
ولا تستناش
اثبت واعرف إيه المطلوب
مليان بذنوب
وعيوب جواك
طب مين قواك
خلاك ما تحسش وتفرق
بين كل الناس
فيه منهم ماس
والنص التاني بيتشكل
ف الرجل مداس
ليه ما بتسواش
الدنيا بدون حبة شخابيط
أو تبقي حويط
الدنيا اكيد عايزه التنطيط
ولا ترحمشي لو كنت عبيط
و غويط البير مليان اسرار
وكمان أشرار جواه صاحيين
و لا بد حنين
يسكن بيتك و تعيش مستور
و عليك الدور
تصبح سيد مرفوع الراس
علي أي اساس بتسيب نفسك
و تعيش محتاس
ما تشيل الفاس
و اعزق حلمك وافتح أبواب
الروح سرداب
مليان بجراح و عشان ترتاح
لازم تتعب و تهز الكون
و تهد سجون
صبرك و تقوم
كفاياك النوم
إقتل اوجاعك قدامك
و ابدأ م اليوم
الوقت كسبحه بتتفرفط
و دا شئ مقسوم
طب ليه مهموم
حاول تبني من ضلعك بيت
تزرع فيه فل
و تشيل الغل
اللي بيسكن ف بطون الناس
موجود وسواس
بيوسوس فيك
إيه اللي عاميك
انفض أوهام ماسكاك علطول
ليه حزنك غول
و مكلبش فيك
عايش و لاهيك
عن كل طريق
وما زلت غريق
محتاج انسان
علشان يهديك
ويشد ايديك
وتبات ف امان
إرمي الحرمان
علي مد الشوف
وجبال الخوف
بعترها بعيد
دا السعد وليد
ممسوك بلجام
واسعله القيد
علشان تكْتر
طموحاتك فيك
و النور يناديك
أوعاك تستسلم أو تحتار
لو اول خطوه بتفشلها
أوعاك تنهار
ولابد تقوم
تتفائل بالخير يوم تلاقيه
و يقين يكفيه
فماتستعجلش علي الايام
المكتوب ليك هتشوفه أكيد
وازاي هتحيد
لو تعمل دايماً بالأسباب
و ما حدش خاب
غير لما اليأس بيمسك فيه
الشمس اكيد عمرها ما تغيب
غير وسط الليل
و الحلم طويل
و مأهوش ساهل
و بيستاهل تتعب له كتير
والفعل ما يبقاش بس كلام
و لا يبقى قليل
الأمر بسيط جدا منك
مش محتاج غير حبة تأهيل
