محمود عثمان يكتب: عزيزى سائق الباص "رحلة واحدة تكفى"

ذهبت إلى رحلة سياحية أنا وأولادى بعد حجز الفندق وركبنا الباص متجها إلى إحدى المدن السياحية  وطبعا الطريق 400 كيلومتر مسافة كبيرة تستغرق 6 - 7 ساعات ، بعد 150 كيلو متر وأنا راكب فى أول الباص بعد كرسى السائق أبص عليه ألاقيه بينام وهو يقود طبعا، القلق زاد على وجهى خوفا على أولادى وأولاد الركاب الذين يشاركوننا نفس الرحلة >

 

حاولت أن أتحدث مع السائق علشان يفوق شوية واديتوا مياه وعصير وفى أول ريست دار بيننا هذا الحديث .. قولتلوا انت المفروض تكون فايق أكثر من كده لبعد المسافة وجلوسك على كرسى القيادة بالساعات ؟ قالى يا بيه والله انا لسه واصل من الغردقة إلى القاهرة وبعدها راجع تانى إلى الغردقة .. قولتلوا ازاى انت المفروض تريح على الأقل 8 ساعات تنامهم ؟ قالى أكل العيش .. قولتلوا انا معاك عشان أكل عيشك ممكن تستحمل أى شىء بس لازم تحذر أنت على طريق سريع ومعاك أسر وأطفال، فسألته قولتلوا انت بتاخد كام على الرحلة ؟ قالى من القاهرة للغردقة 100 جنيه فقط ومن الغردقة للقاهرة 100 جنيه يعنى رايح جاى 200 جنيه .. قولتلوا انت بتهزر ولا بتتكلم جاد اقسم وقالى بيكون معايا عهدة من شركة السياحة 3000 جنيه للتفويل انا بفول الباص فى الذهاب فقط 1500 جنيه وراجع نفس الموضوع .. قولتلوا طيب لو حبيت تجيب حاجة تأكلها فى الريست.. قالى على حسابى الشخصى اللى هو طبعا من  100 جنيه. 

 

اندهشت جدا من راتبه واندهشت أيضا من سوء تنظيم بعض الشركات السياحية المسئولة عن الباصات لأن هذا الوضع خطأ ، يجب يكون فى وعى وإشراف أكثر وأكثر على السائقين الذين يقودون الباصات السياحية والإشراف ده يكون صارم جدا فى الذهاب والعودة للسائقين والاطمئنان على صيانة الباصات لمنع أى حوادث لقدر الله ، ويجب على السائق أيضا القيام برحلة واحدة فقط ذهاب أو عودة حتى لا ينام أثناء القيادة ويعرض أرواح الأطفال والعائلات للخطر .