انتقد الداعية السلفى سعيد عبد الفتاح، المعروف باسم "أبو أسلم السلفى"، المايوه الشرعى، مؤكدا أنه حرام شرعا ولا يجوز ارتداؤه.
وقال أبو أسلم السلفى، فى منشور عبر صفحته على موقع التواصل الاجتماعى "فيس بوك": "مفيش حاجه اسمها مايوه شرعى، اوعى الشيطان يضحك عليكِ، مفيش حاجه اسمها تنزلى المياه وترفعى النقاب، لو حضرتك منتقبة ديانة لله عزو جل يبقى النقاب فى البلكونة والشارع وقدام ابن عمك وابن عمتك وفى المصيف وفى كل مكان، مش بمزاجك".
وتابع "السلفى" منشوره بالقول: "مفيش حاجة اسمها ده راجل كبير عادى، الحرام على الصغير حرام على الكبير، مفيش حاجه اسمها صاحبى أو زميلى، وتبادل تليفونات ورسايل واتس وإرسال صور وتبادل إيموشنات، وبعد كده نتكلم فى الحياة الزوجية والخصوصيات وأسرار البيت، وكل واحد يعيش دور المظلوم من الطرف التانى اللى معاه، مفيش حاجه اسمها لسه صغير، ما دام بالغ وجب عليك تتعاملى معاه معاملة البالغ العاقل من ناحية السلام والخلوة والخروج والسفر والحجاب".
واستكمل الداعية السلفى منشوره بالقول: "مفيش حاجه اسمها خطيبى، خطيبك ده أجنبى عنك، الحق الوحيد ليه إنه لا يجوز خطبتك على خطبته، غير كده ملوش لا خروج ولا فسح ولا يمسك إيدك ولا بحبك ولا انت عمرى ولا الجو ده خالص، مفيش حاجه اسمها رحلة فيها صحابك بنات وولاد وطالعة 3 أيام ومش معاك محرم، أقسم بالله حرام عليك وعلى الأب".
