حمدى الغفير يكتب: ليه البنات كائن ينمو ويترعرع فى الحمام؟

صديقاتى الفاتنات افتقدتكن جدا من الأسبوع اللى فات، دخلنا الجامعة ولبسنا الحاجات والمحتاجات، وفرجتوا الشباب على التاتوهات والاوف شولدرات وخربتوها والحمد لله، طبعًا انتم عارفين إنى خلقى كِنِز حبتين مع بعض التصرفات، اللى هندخلها ضمن الاسئلة الوجودية اللى بندورلها على إجابات بعد الساعة 12 بالليل حيث الأوفر ثينكنج وسنين أمه السودة.

يعنى زى ما بنسأل كيف بدأ الخلق والفرخة الأول ولا البيضة، بنسأل كمان ليه الست كائن ينمو ويترعرع فى الحمام؟، بجد والله مش بهزر معاكم بتقعدى أكتر من ساعة فى الحمام تعملى ايه سواء فى الشغل أو الجامعة أو حتى حمام كنتاكى، ده الواحد مننا بيدخل يلبى نداء الطبيعة ويغسل ايده ويخرج مبيكملش 3 دقايق سِك ترِك خرج، انتى بقى متعرفيش إنك بتثيرى حواليكى كل علامات الريبة وانتى بتبصى لصاحباتك وتهزى دماغك فجأة وتقوليلهم " ياللا" فهوبا ب "تياللا" كلكم وواحدة واحدة تقوم ساحبة المِخلة بتاعتها ولفحاها على كتفها وتبدأ رحلة الحمام المقدسة.

طبعا انا واحد بتخنق بسرعة فسألت صديقات عزيزات بتعلموا ايه فى الحمام كل ده؟، فردت واحدة بنعدل الطرحة قولتلها يا مؤمنة بقالك ساعة بتحطى لا مؤاخذة الدبوس فى الايشارب وتبينى نص شعرك فى ساعة، قامت صاحبتها قالتلى بنظبط الميكب وهنا بقى انا أدركت مرحلة التركيب الفيزيائى المعقد لألوان الروج اللى اينشتاين بجلالة قدره معرفش يوصله، بتحطى 600 لون روج على بعض وبتخرجى كأنك غضة كلب يا شيخة ومتنكة اووى، لأ وتسالى " حلو ميكس الروج ده؟" عشان ترد عليكى صاحبتك أم ضب تقولك "واوو النود عليكى يجنن" جاكى جن لما يجننكم انتم الاتنين إيه القهر ده، إيه بتعملى تحليل لجزيئات الروج عشان تعالجى بيها قشف شفايفك بقالك ساعة يا ماما فى ايه.

خلصنا من ست الكل أم روج،  دخلنا بقى ع الحاجة مرات شيخ البلد اللى ولا مؤاخذة عاملة "استديو الكابينيه" بتناقش فيه قضايا كونية ونم وتكراش ومتابعة لأحدث فضايح اكونتات الخلق على السوشيال ميديا، يعنى انتى طول النهار بترغى ما بين شات وتليفون ومش مكفيكى ايه لازم تعمليلهم ايموشن القرد المخضوض لايف يعنى، يا حبيبتى الحمام ده اسمه بيت الراحة مش بيت ستك عشان نعمل محدتة جوا، وطول مانتى واقفة مش مستحملة ريحة المسك والعنبر اللى جوا وعمالة "تأفأفى" يعنى انتى فى الحمام مش فى محلات ماء الذهب للعطور عاوزة تشمى ايه يعنى، ولما انتى كيوتة وبتقرفى واقفة جوا ساعة ولاطعة جوزك ولا خطيبك ولا شغلك ولا واحدة مزنوقة ليه يا باردة؟!

نيجى بقى للبنات اللى عندهم مخزون فائض من "الزغر" فبيدخلوا يفرغوه فى الحمام، يعنى الواحدة تقوم رازعة اللى فى ايدها وبصوت جاموسة بتشحر تقولك " انا رايحة التويلت" تدخل  يا مؤمن ترمى نظرة عامة وتحدد أهدافها هزغر لدى وازغد دى واقولها "سورى يا روحى" وتقوم خارجة كائن مؤذى بالفطرة، طلعت روحك يا بعيدة كفاية غلب بقى.

شوفى احنا كل ده بنتكلم عن اللى بتعمليه فى الحمام لمدة ساعة، نفسى بقى تسألوا نفسكم السؤال ده، بتعملى ايه فى الحمام دانتم خليتوه الحاجة الوحيدة اللى وقت الذروة فيها طول اليوم، وبرضه بتخرجوا نشوفكم ونقول أعوذ بالله من الخبث والخبائث، ارحموا اللى جابوا أهالينا بقى..

ياللا سلام