أكد الرئيس عبد الفتاح السيسى، أنه لن يكون حكراً على اختيار المصريين لرئيسهم القادم فى الانتخابات الرئاسية، موصياً الشعب بأن يختار الأصلح، ومن يأتمنونه على مستقبلهم ومستقبل أولادهم، محذراً أنه لن يسمح لفاسد بالاقتراب من هذا المنصب.
وقال السيسى، فى جلسة "إسأل الرئيس" ضمن مؤتمر "حكاية وطن" موجهاً حديثه لـ"المصريين": "ليه قالقانين إننا منستمرش على طريقنا فى التخطيط، يا إما انتوا متشككين فى التخطيط، يا إما انتوا متشككين فى القادم، هل التخطيط اللى موجود دلوقتى لـ 2030 فيه تخطيط ممكن يتحط لأفضل منه هل إنتوا متخيلين إنكم ممكن تدوا صوتكم لأى حد".
وتابع: "تخيروا واختاروا وخليكوا حريصيين جداً جدا فى اختياركم، لا تعطوا صوتكم إلا لمن ترونه يستحق أنه يتولى أمركم".
وأردف، خلال جلسة الإجابة على أسئلة أسأل الرئيس، بمؤتمر حكاية وطن: "أنا مش رئيس أنا إنسان زيكم جيتوا قولتوله تعالى خلى بالك، فيه إنسان كده أه فيه، لكن بعد كده لازم تختاروا كويس أوى إنتوا هتسلموه مستقبلكم ومستقبل أبناءكم".
وواصل: "أنا أكتر رئيس اتكلم مع شعبة فى الموضوعات المختلفة، كان ممكن الإعلام يقوم بالدور ده أو المسجد أو المدرسة، هل مصر متستحقش منك يا مصرى تقعد 10 أيام عشان تفكر وتختار، هل متستحقش منك توقف يومين فى الشارع عشان تختار، اختاروا جيدا بدل ما تقولوا اللى جاى هيعمل ايه، اللى جاء هيعمل بناء على اختيارتكم".
واستطرد: "أنا لو أقدر أمنع الفاسد إنه يتولى أمركم كنت منعته، وأنا عارف الفاسد مين، عارفهعم كويس.
لكن لأمانة المسؤولية اللى هيقرب من الفاسدين من الكرسى ده يحذر منى، أنا مش هبقى حكر عليكم، لكن فيه ناس لن أسمح لهم بالاقتراب من الكرسى ده".
وأضاف: "يبقى أنا عارف إنه كان حرامى وفاسد واسيبه ربنا يحاسبنى، مش مش انتوا اللى تحاسبونى، لكن ناس أفاضل تختاروا منهم ربنا يا رب يوفقهم، مصر أعز وأشرف وأكبر من أن يتولاها ناس فاسدين".
السيسى: "بناء أى دولة يستغرق من 16 لـ20 سنة وأنا بحاول أخلص فى 8 فقط"
قال الرئيس عبد الفتاح السيسى، إن مشروع قناة السويس لم يكن وليد اللحظة، لكنه ضمن مشروعات تم دراستها على مدى سنوات كبيرة، موضحاً أن الدولة المصرية خلال الأربعين عاماً الماضية كانت فيها دراسات لمشروعات ولكن لم تنفذ، وعندما جاءت الفرصة تم تنفيذها.
وأضاف الريئس السيسى خلال جلسة الرد على الأسئلة التى وجهت إليه فى مبادرة "اسأل الرئيس"، ضمن فعاليات اليوم الثالث والأخير، من مؤتمر "حكاية وطن"، أن مرفق السكة الحديد كانت له دراسات لتطويره، موضحاً أن ما يتم تنفيذه عبارة عن تخطيط إدارى للجمهورية والمطارات وشبكة الطرق القومية، له أصل فى التخطيط.
وتابع: "احنا قربنا نخلص، ولو جه حد وحب يعمل، مش هيلحق.. احنا خلصنا، وأعتبر أن أى بناء لدولة يأخذ 16 لـ 20 سنة، وأنا بحاول أخلص الموضوع فى الـ8 وربنا يعينا على ده".
السيسى عن عمل اللاجئين فى مصر: لما ناس الزمن يجير عليهم لازم نقف جنبهم
أكد الرئيس عبد الفتاح السيسى، أن مصر يوجد لديها ما يقرب من 5 ملايين لاجئ، يتم التعامل معهم مثل المصريين دون تمييز، مشيراً إلى أن مصر الدولة الوحيدة، التى لا يوجد بها معسكرات لاجئين.
وأضاف السيسى، رداً على سؤال حول "عمل اللاجئين" فى مصر، وأنهم يستحوذون على فرص عمل من المصريين، أجاب السيسى: "لما يكون فى ناس جار عليهم الزمان، لازم نقف جنبهم، ومصر طول عمرها كده، لما كان فيه اضطهاد فى الأرمن جم وعاشوا معانا".
وتابع: "كتر خيرهم إنهم بيشتغلوا، ده حاجة عظيمة إنهم بيشتغلوا ويعيلوا نفسهم، ومصر بلدهم ويا رب يسلم بلادهم".
السيسى عن أهمية القوة العسكرية: نحمى حقول غاز على مسافة 200 كيلو من شواطئنا
كشف الرئيس عبد الفتاح السيسى، أن مصر تعرضت لاستفزازات على شاطئ البحر المتوسط، إلا أن وجود قوات مصرية، حال دون نجاح هذه الاستفزازات.
وقال السيسى، فى جلسة "اسأل الرئيس"، ضمن فعاليات مؤتمر "حكاية وطن": "لو كان معندناش قدرة عسكرية كويسة ومناسبة، والنهاردة بنتكلم على تأمين حقول، على مسافة 200 كيلو من شواطئنا فى البحر المتوسط، هل كان ممكن يجى يستفزنا هناك؟ آه، طب حد حاول؟ آه، بس إحنا كنا موجودين بقواتنا فخلاص".
وتابع الرئيس: "الناس اللى بيخشوا فى صراع مع حد بيبقوا عارفين قدراتهم، وفيه أجهزة مخابرات بتعمل تقديرات، وحاجات بتتقاس وتتابع، وبتعمل كل شئ عشان تتطمن قبل ما تخش فى أزمة".
الرئيس السيسى: أنا وزير المرأة.. والكفاءة معيار الاختيار الوحيد
أكد الرئيس عبد الفتاح السيسى أن المرأة المصرية لا تحتاج وزيرة خاصة لأنه شخصيا يهتم بأمرها قائلا: "أنا وزير المرأة".
وأوضح الرئيس، خلال جلسة أسأل الرئيس، بمؤتمر "حكاية وطن"، أننا لا نحتاج وزير لشئون المرأة، موضحا أن بعض الوزراء يغضبون بسبب شعورهم بانحيازه لها.
وأضاف الرئيس،:"لا أنحاز وعامل الكفائة هو المعيار الوحيد لاختيار الوزراء"، مشددا على أننا نختار فى إطار المتاح، ومصر بها العديد من النابغين فى جميع التخصصات، لكن المشكلة التى قلتها منذ 3 سنوات أننا ليس لدينا الآليات لنقيم ما لدينا وندفع به ليتبوأ مكانته الحقيقية.
وتابع الرئيس السيسى: "يكفى رئيس للمرأة.. هنعمل رئيس ووزير يبقى كتير قوى".
السيسى: "كنت بساعد أهل بيتى بشيل وأغسل معاهم الحاجة.. ولى الفخر"
قال الرئيس عبد الفتاح السيسى، أن تقييمه للمرأة فى ظل الظروف الاقتصادية الصعبة، هى أنها "تُعلّم وتؤكل وتشرّب"، موضحاً أن الكتلة الغالبة فى مصر ليست غنية.
وأضاف الرئيس السيسى، خلال جلسة الرد على الأسئلة التى وجهت إليه فى مبادرة "اسأل الرئيس"، ضمن فعاليات اليوم الثالث والأخير، من مؤتمر "حكاية وطن": "أن المرأة تذهب للعمل، وتعود لإعداد الطعام لأولادها عندما يعودون من مدارسهم، وتابع: "الراجل فى البيت قاعد عاوز مراته تأكله وتجيبله شاى ومش عارف إيه".
وأوضح الرئيس: "أنا عاوز أقولكم، ما كنتش بعمل كده خالص، وكنت بشيل مع أهل بيتى وأغسل معاهم الحاجة.. ولى الفخر بهذا".
السيسى يكشف معلومات خطيرة عن فض اعتصام رابعة وأصحاب "الوساطة"
كشف الرئيس عبد الفتاح السيسى، معلومات جديدة حول "اعتصام رابعة العدوية"، موضحا أنه لم يتم القبض على واحد أو الإساءة لأحد، وتم ترك المعتصمين فى رابعة لأكثر من 45 يوما.
وتابع الرئيس: "والناس اللى اتوسطت.. كتير من الذنوب فى رقبتهم.. لأنهم قالولى فى رمضان من فضلك ممكن متعملهمش حاجة.. قلتلهم يقعدوا بدل اليوم كذا يوم.. بس ميخرجوش بره رابعة على المطار وعلى العباسية يوقفوا حال البلد.. اتقالى كتر خيرك.. راحوا ومرجعوش، ومقالوش إن هما قالولهم هنموتكم عندنا جوه رابعة ومترجعوش.. ما دام السيسى وافق على كده يبقى خايف من الأمريكان"، مستكملا: "والله أنا ما خايف من الأمريكان بس كنت خايف من ربنا.. ومسابولناش خيار تانى.. وكل ما نمسك بنلاقى معاهم سلاح والمتفجرات والتخطيط والقتل للأسف فكر خطير غير قابل للحياة ولا مع نفسه وممكن يقتل نفسه".
