شاهد.. رسالة هيدى كرم حول علاقة الجمهور والمشاهير على السوشيال ميديا

وجهة الفنانة هيدى كرم، رسالة إلى الجمهور ونجوم المجتمع، اليوم الإثنين، عبر مقطع فيديو، تحت اسم "علاقة المشاهير بالجمهور"، والذى تناولت فيه العلاقة بين الجمهور والمشاهير على مواقع السوشيال ميديا، حيث أبرزت مدى التناقض بين حرص الفانز على متابعة النجوم الذين يحبونهم، وفى الوقت ذاته يوجهون لهم السباب والشتائم ويحقدون عليهم أحيانًا، موضحة الأسباب وراء ذلك والتى تعود للطرفين، دون أن تلقى باللوم على طرف دون الآخر.

وقالت الفنانة هيدى كرم، فى مقطع الفيديو، "فى علاقة غريبة جدًا بتجمع بعض الفانز والمشاهير، أوقات على السوشيال ميديا بيكون فى ناس بتشتمنا وتقل من قيمتنا وتهيننا، وبنسأل ليه الحقد ده؟.. ليه العلاقة الغربية والتناقض بين إنك بتحبنى وبتابعنى وفى الناحية التانية بتكرهنى وتحقد عليا وتحتقرنى جدًا، ليه شايف إنك إنسانة لازم تكون محتقرة ومهنتى لازم تحتقر وإن أنا مش كويسة أو مش محترمة أو دمى تقيل ومغرورة"، مضيفة "مش عايزه أقول للناس اللى بتشتمنا اعملوا عدم متابعة أو إننا نعمل ليهم "بلوك"، ولكن السؤال "لما أنت بتحتقرنى أوى كده بتشوفنى ليه وبتتبعنى ليه وبتشوف فيديوهاتى ليه؟ علشان تشتمنى وتهيننى!!".

وأضافت هيدى كرم، "دى حاجة بتزعلنى، ورغم إنهم مش كتير، لكن دايمًا الحاجة الوحشة بتظهر وبتضايق، فتعليق واحد على انستجرام فيه شتيمة يضايق أكثر من 10 تعليقات فيهم مدح، لأنه يهين ويوجع، وأنا بعذر الناس لأن فى خطأ بيقع علينا احنا كمشاهير، والخطأ هو إننا بنصور حياتنا وكأنها فى الجنة، كأننا ناس مش عايشة على الأرض".

هيدى كرم

وتابعت "احنا على طول بنشير صور على البحر وحمام السباحة وبنكون بأحلى لبس وفى أماكن فخمة وبناكل أكل فظيع واحنا مبسوطين ومع أصحابنا وبنسمع مزيكا، واحنا بردو بنصدر للجمهور حاجات فى بعض الأحيان مستفزة حتى لو كان هدفنا الحقيقى إننا نعطيهم طاقة إيجابية، أو نسليهم ونبسطهم، لكن الهدف ده ليس الانطباع الذى يصل للآخر".

تدوينة هيدى كرم

واستطردت "الشخص اللى بيستخدم السوشيال ميديا ويشعر أنه مقهور فى الحياة ولم يأخذ فرصته ويشعر أنه غير سعيد ولا يستطيع تحقيق نفسه وما يحلم به، لما يشوفنا فى صور فيديوهات وصور فظيعة ولطيفة، بيعتقد إننا مش عايشين فى الدنيا والأرض ديه، وإننا عايشين فى الجنة، وإننا مش بشر من دم ولحم، وكأننا كائنات تانية، فلازم يحقد علينا لأننا بنصدره الإحساس إننا مش حاسين بيه، فحتى إذا كان هدفنا الترفية وتسلية الناس، فإحنا بنقهرهم وبنحسسهم إننا عايشين وهما مش عايشين".

وقالت "لكن دى مش حقيقة، لأننا بيموت لينا ناس، وبيتعب لينا ناس، واحنا بنتعب، وبنكون محبطين ومقهورين، ولكننا لا نصدر هذا، فلابد أن نصدر للناس حقيقة إننا بشر من لحم ودم، ولينا أيام سعيدة وتعيسة لكل البشر، وفى النهاية إحنا مش بنستغنى عن الفانز بتوعنا، والفانز بتوعنا مش بيستغنوا عننا".