توفيق عكاشة يضع روشتة سد عجز الموازنة.. صباح تربى فراخ وتشتغل بدل ما تنقل كلام

شرح الإعلامى توفيق عكاشة، كيفية سد العجز فى موازنة الدولة، باستخدام مثال مبسط عن طريق "صباح والفراخ".

وأضاف "عكاشة" خلال تقديمه برنامج "مصر اليوم"، على فضائية "الحياة"، : "يا صباح من قعدتك من قلة الشغل بقى وزنك 2 طن، اشتغلى بدل ما بتتنقلى من المصطبة دى ودى وتنقلى كلام، اشتغلى انتى وليلى، لو ضيغتى وقتك فى تربية شوية فراخ وبط وغنم وماعز تتحول القرية إلى منتجة، مردفاً:"عاوزين نسد العجز ما بين الاستهلاك والإنتاج، لأن هناك فجوة".

وتابع:"العجز اللى هو جوزك بياخد مرتب ألف جنيه وانتى قاعدة مش بتشتغلى ومالكيش لزمة وبتخبطى من جوزك 800 جنيه، وبتسيبيله 200 جنيه، وتلاقى نفسك يوم 21 فى الشهر مش معاكى فلوس، وتتشككى من الدكاكين بـ 200 جنيه، يعنى انتى عندك عجز 200 جنيه".

وأشار "عكاشة"، إلى أن هذا هو العجز فى الميزانية، وهذه هى ميزانية الدولة، مستطرداً:" بدل ما تروحى تتشككى فى الدكاكين، ولو ربيتى شوية فراخ وجابوا بيض وأكلتى البيض وبيعتى الفايض هتسدى العجز، وهو دا المطلوب إن احنا نعمله".