مجموعة من 7 شباب تتراوح أعمارهم بين الـ21 عاما والـ23 فكروا فى تغيير مظهر الشارع الذى يقطنون فيه، من قمامة ملقاة على الأرض وأتربة على الجدران إلى ألوان زاهية ورسومات رائعة.
الشباب يرسمون الجدران
وقال محمد عبد السميع محمد من سكان شارع الإدارة ديكرنس بالمنصورة، صاحب الفكرة، ويعمل بائع وحاصل على دبلوم تجارة: "فى برميل قمامة عندنا فى الشارع كل يوم وأنا مروح من الشغل ألاقى الناس بترمى الزبالة حول البرميل وليست بداخله، وكنت بجمعها وأحطها فى البرميل، وفى يوم جاتنى فكرة وقلتها لـ6 من أصحابى وهما ساكنين معايا فى نفس الشارع ووافقونى على الفكرة وقالولى احنا معاك ده كمان هيبقى يوم لطيف هنقضيه مع بعض وجمعنا مبلغ بسيط من بعضنا".
شركاء محمد فى العمل التطوعى هم: أحمد محمد طالب بكلية الفنون الجميلة جامعة المنصورة، السيد جدو فى كلية تجارة، عمر مجدى كلية تجارة، محمد إبراهيم حاصل على دبلوم صنايع، مدحت عمارة كلية تجارة، وأحمد جمعة نقاش، 7 شباب غيروا مظهر الشارع.
فى البداية كانت فكرتهم كتابة بضع كلمات خلف برميل القمامة تحض الناس على إلقاء القمامة داخل الصندوق ولكن بمجرد بدأ المشروع أعجب المارة بما فعلوه وبدأ البعض يسألهم عن مصدر التمويل، وعندما أخبروهم أنها من مساهماتهم تبرع البعض منهم بمبالغ بسيطة، وعندما تجمع معهم مبلغ معقول بدأوا فى الرسم على الجدران فرسموا الأهرامات وجدارية لمحمد صلاح، وفى نيتهم أيضا أن يرسموا صورة لإمام الدعاة الراحل الشيخ محمد متولى الشعراوى، كما أنهم يعملون حاليا على جدارية وضعوا لها عنوان مصر الحضارة.
وتابع محمد عبد السميع: "نفسى كل شارع يكون فيه مجموعة شباب زينا مصر هتبقى حاجة تانية وشوارعنا هتكون مختلفة، لأن الناس لما شافتنا بنلون الشارع بدأوا يستحوا يرموا الزبالة خارج الصندوق ده غير إن فى أطفال كتير فى الشارع كانت بتيجى تكنس الشارع وكمان كانوا بيفرحوا لما نديهم فرشة ونخليهم يلونوا معانا، إن شاء الله ناويين نكمل الشارع كله".
تم أضافة تعليقك سوف يظهر بعد المراجعة