يوم ما رفرف العلم فى أرض سيناء / فرحنا وقلنا يارب احفظ أراضينا
دى سيناء فى القلب وجوة عنينا / أبويا وعمى حكوا لى عن الفرحة يوم انتصارنا
قالوا كانت لهفة وشوق يوم ما عبرنا / وفى الشط التانى للقنال كبرنا لما عدينا
ولفت الأيام وكبرت وانطلبت للتجنيد / وقابلت اخويا مينا كان أول يوم فى الجيش
بنقسم مع بعض الجراية يعنى رغيف العيش / وجت لينا مأمورية أتارينا رايحين سينا
فرحنا وهللنا من السعادة وندهت لاخويا مينا / قال يا مسلم احنا مش هنفارق بعضينا
يا النصر يا الشهادة دى سينا غالية علينا / لازم من الارهاب نحررها ونطهرها
والسلاح مش هيفارق ايدينا / ونزلت اجازة اودع الاهل والاحباب قبل ما اروح سينا
امى قالت لى رايحين فين قلت ليها رايح سينا / هطهر من الارهاب اراضينا
قالت مستنياك يا بطل / قلت ليها يا امة ان رحت وغبت متعيطيش
دة ابنك شهيد وفى الجنة هيعيش / اوعاكى يوم تزعلى ما تبكيش
دة ابنك زى ابوة بطل / وراح احرر ارضنا من دنس فكر ارهاب غبى فية هطل
زى ابويا لما رفع العلم زمان / وجدى اللى علم وبنى حضارة الانسان
لازم اسيب بصمة لاولادى يتحاكوا بيها / ويفخروا بجيشنا فى كل مكان واوان
ده انا ابن مصر شايل روحى على كفى / علشان اولاد بلدى يعيشوا فى امان
وكاتب على الجبين الشهادة عنوان / دة الجنة يا أمة قريبة
وان مت يا أمة متزعليش / عايزك تزغردى وتفرقى فى فرحى كحك وغريبة
وتقولى ابنى ساب ذكرى طيبة / ضحى بنفسة علشان ارضنا تفضل طاهرة وطيبة
وكان شعاره الكفاح وعزيمتة لمصر سلاح / وكل شىء علشانها يهون وبالروح يفديها
وتحيا مصر شعارنا / ودعائنا حفظ الله الوطن والجيش رمز الكفاح والفلاح
وكلنا لمصر فداء لأجل تعلا لفوق / ودايما يا بلدى بأولادك فى تفوق ونجاح
