راندا جاد تكتب: أبواب مواربة

علاقاتك بالناس زى الأبواب .. فيه أبواب مفتوحة وفيه أبواب مواربة ولازم يكون فيه أبواب مقفولة وكمان أبواب متربسة للسفر .

افتحي باب حياتك وقلبك لأهلك اللى من دمك واللى انت واثقة أنهم بيحبوكى وعمرهم ما حيحقدوا عليكى أو يشمتوا في مشاكلك أو يتخنقوا من وجودك فى حياتهم .. افتحى باب حياتك لأولادك وأزواجهم وأحفادك حتى لو طلعوا بتوع مصالحهم مهما كبرت وعجزت هم محتاجين وجودك وحبك وحنانك .

واربى الباب لأى حد غيرهم حتى لو كانوا كويسين من الظاهر .. الله أعلم بالباطن .. خلى حياتك الشخصية خاصة جدا محدش يعرف عنها حاجة إلا أقل القليل . كتير من الناس يبانوا كويسين ويحبوكى وعند أول مشكلة تكتشفى انك مجرد عدد إضافي فى حياتهم .

اقفلي بابك أمام أى حد يغلط فيكى أو يتعدى حدوده معاكى أو يفتكرك ضعيفة وعاوز يستقوى عليكى ... انتى مش قليلة .. انتى مش ضعيفة. . انتى مش محتاجة لحد. .

تربسي بابك أمام كل حقود وغيور أو يتمنالك الشر واياكى تفتحيه تانى أو حتى تواربيه .. الناس دول قلتهم فى حياتك بركة ووجودهم نقمة .

افتحى بابك لكل حلم و كل أمل جديد .. افتحى بابك للسعادة والفرحة ... احلمى و حققى حلمك و حاربى ولازم تكوني عارفة ان أقرب الناس ليكى حيحاربوا حلمك مش علشان بيكرهوكى بالعكس هم بيحبوكى لدرجة إنهم عايزين يمتلكوكى .. عايزينك بتاعتهم بس انتى مش بتاعه حد .. انتى بتاعت نفسك .

الشرع والقانون حددوا أن الأم دورها لحد ما الأولاد يبلغوا بعد كدة الأولاد يروحوا لوالدهم  ... يعنى انت دورك كأم انتهى لما كبروا بعد كدة انتى صديقة ... أيوه انت صديقة لأولادك و زوجة وحبيبة فقط لا غير .. وعلشان تبقى صديقة مناسبة لاولادك لازم تكونى متعلمة و متفهمة ولازم تقدرى تواكبى التغيير فى الفكر بين الأجيال. . دة يحصل لما تهتمى بنفسك وثقافتك و تثبتى وجودك .

اقفلى التليفزيون مش حيفيدك لو عرفت ان حبيشة حينتقم ولا لأ ... اصل حبيشة مش من وسطك ولا طبقتك .... مش حيفيدك ان يحيى الفخراني حيرجع لميرفت امين ولا لأ لانك مش ذيهم ولا عندك ملايينهم .... اتفرجى على اللى حيفيدك وبيتكلم عنك وعن طبقتك و مشاكلك .

افتحي بابك للذكريات الجميلة علشان تعيشي فى سعادة .. واربى بابك للذكريات السيئة علشان لازم تفتكريها وتتعلمى منها ولو دخلت غصب عنك وحسيت بحزن حولى حزنك لطاقة عمل .. خلى حزنك سبب فى نجاحك وابداعك .. أغلب المبدعين أبدعوا من حياتهم البائسة.

لازم تنجحى علشان ولادك وجوزك ينجحوا .. ولو لقيتى حياتك زى ماهى من خمس سنين أحمدي ربنا بس اعرفى انك لازم تعيدى النظر وتعيدى ترتيب أفكارك ولازم تتغيرى للأحسن.

بلدنا تستحق اننا نتغير علشانها لأنها جميلة وهى اللى حتحضن أولادنا. .. بلاش نخلى حضنها شوك فى أجساد أولادنا.