حلت الفنانة منال سلامة وزوجها المخرج عادل أديب، ضيفين على برنامج "جوز مشاهير" الذي يذاع الجمعة والسبت من كل أسبوع في التاسعة مساءً على راديو "إينرجي"، وقالت منال:" تعرفت على عادل أديب في أكاديمية الفنون، حينما كان طالبا في معهد السينما وكنت أدرس في معهد الفنون المسرحية "كان بيحبني وأنا مش واخدة بالي".
وأضافت: عادل عرض علي الزواج "وإحنا طلاب".. قال لي "لو اتخرجت وخلصت جيش وعملت أول فيلم تقبلي تتجوزيني؟!، ووافقت على طول من غير ترتيب أو تفكير"، ووقتها "كنا بنشتغل أي حاجة تتعرض علينا عشان نفضل مع بعض ونعمل بيتنا .. والبيت اللي اتجوزنا فيه كان 48 متر".
وتابعت، عادل شخص نبيل وكريم لم تلوثه الحياة .. وربنا كرمني بيه ، وعمري ما غيرت على عادل لأن الغيرة عدم ثقة في النفس أو عدم ثقة في الطرف الآخر، مشيرة إلى أن عادل هو المادة الخام للمثالية بشكل مفزع.. الناس مش بيصدقوا إنه مثالي كده" .
من جانبه قال عادل أديب "منال شخصية مثالية عايزة كل شيء مظبوط وصح .. وهي اللي ظابطة إيقاع حياتنا"، مضيفا، كنت أغار على منال حين قدمت الشخصية الرئيسية في مسرحية "من يخاف فرجينيا وولف"، "صدقتها جدًا في الشخصية واللي بتدور حول سيدة سيئة السمعة" .
