أميرة تشارك بموهبتها فى الرسم.. وتؤكد: نفسى أبقى أحسن رسامة فى العالم

شاركت القارئة أميرة لطفى البالغة من العمر 22 سنة من محافظة الشرقيه مركز الزقازيق منطقة الأحرار، والحاصلة على بكالوريوس التجارة من جامعة الزقازيق عام 2018، بموهبتها فى الرسم.

إحدى رسومات القارئة (1)

وقالت القارئة فى رسالتها لصحافة المواطن: أنا مش بشتغل حاليا ومصدر اهتمامى وشغلى حاليا الرسم، أنا بدأت ارسم من كام شهر بنفصل بحكم دراستى والامتحانات وعشان مقصرش فيها وبرجع تانى فى وقت فراغى ارسم.

وعن الادوات التى تستخدمها أميرة قالت حتى الآن الرصاص بدرجاته وألوان فايبر كاستل وماندلا برسمها بأقلام ستدلر واستابيليوو وبستخدم ورق كانسون، اللى حببنى ف الرسم من صغرى اخويا شريف الكبير كان بيرسم مناظر طبيعية وكرتون وكنت بحب أقلده فى الرسم جدا لحد ماحبيت الرسم وهوا انقطع عن الرسم وماما وبابا شجعونى اكمل فيه وأقدم فى مسابقات للرسم.

إحدى رسومات القارئة (9)

وقالت عن حكايتها مع الرسم: بدأت من ابتدائى كنت بحب ارسم جدا وبستنى حصة الرسم كل اسبوع عشان أرسم فيها لدرجة إنى كنت باخد اسكتش الرسم معايا فى باقى أيام الأسبوع لو حصة فاضية أرسم فيها مدير مدرستى كان بيحب رسوماتى جدا أنا وأخويا شريف وكان بيعلق لوحاتى فى غرفته من كتر إعجابه بيها، واستمريت فى حبى للرسم ورسوماتى، وبقيت أقدم فى كل المسابقات الخاصة بالرسم بمدرستى وكنت دايما بطلع مركز أول لحد ما فيوم طلبت منى مس الرسم بتاعتى رسمة عن حرب اكتوبر وادخل بيها مسابقة على مستوى المحافظة وكانت واثقة إنى هنجح فيها وطلبت منى مكتبش اسمى علي رسمتى لحرب أكتوبر عشان هيا تكتبه بخط كويس عليها مش ابوظها بخطى وانا كطفلة صدقتها ووثقت فيها ووافقت وقعدت ارسم فيها لمدة أسبوع واتقنتها جداا ورسمت فيها دبابات وطائرات ناس متوفية وعلم مصر وشكل المصابين والمقاتلين فالحرب فاكرة لوحتى بكل تفاصيلها 22 سنة وفكراها لحد الآن...كانت جميلة جدا بجد وبالفعل عملت اللوحة للمسابقة دى وسلمتها للمس بتاعتى وكانت الصدمة بالنسبالى بجد، اخدت رسمتى وبدل ماتكتب اسمى كتبت اسم ابنها كان قدى ومعايا فالفصل بس مكنش بيعرف يرسم وردة وبما إنها مسابقة على مستوى المحافظة وهيا واثقة ومتاكدة إن لوحتى هتاخد مركز نسبت اللوحة لابنها وقدمتها فى المسابقة وحصل المتوقع رسمتى اخدت مركز أول على مستوى محافظة الشرقية، واتكرم بمجهودى وتعبى كطفلة فى رسمة لمدة أسبوع عشان فى الاخر تعبى يضيع، بعد الصدمة دى وشهرته فى المدرسة إنه خد مركز فى مسابقة رسم باللى هيا فالاصل رسمتى كرهت الرسم وقطعت اسكتش الرسم بتاعى، وبعدت عن الرسم تماما وحصلتلىى عقدة من الرسم وقتها كنت فى خامسة ابتدائى انقطعت عن الرسم لمدة 12 سنة تقريبا مرسمتش أى حاجة وانقطعت تماما عن الرسم..

إحدى رسومات القارئة (8)

وأكملت: من خمس شهور لقتنى فجاءة عاوزة ارسم وأعوض اللى ضاع منى من وأنا صغيرة وخدتها تحدى مع نفسى إنى لازم أرجع وأبقى قوية بموهبتى وأنميها وأطورها لحد ما أوصل لحلمى وأبقى أحسن رسامة فى العالم حلمى مش محافظة ولا مدينة لا أنا هنافس على مستوى العالم لحد ما أوصل لحلمى، ورجعت للرسم تانى وجبت أدوات جديدة ببداية جديدة ليا خالص مع الرسم، وكنت فرحانة بنفسى جدا ساعتها انى وصلت لرسمة من غير كورسات ومن غير أى حاجة وكان تشجيع أمى وأبويا ليا حافز كبير جدا، وتوالت الرسومات رسمة فالتانية وكل رسمة كنت برسمها كان مستوايا بيطور بشكل ملحوظ فيها كنت ارسم وانقطع بحكم دراستى وإنها آخر سنة ليا وبحافظ على تقديرى ف دراستى واستمريت فالرسم وكانت كل رسمة بتحمسنى أبقى أحسن .

 

 

 

 

 

شاركونا فى تحرير المواد الصحفية بإرسال الصور والفيديوهات والأخبار الموثقة لنشرها بالموقع والجريدة المطبوعة، عبر خدمة "واتس آب اليوم السابع" برقم 01280003799، أو عبر البريد الإلكترونى send@youm7.com، أو عبر رسائل "فيس بوك"، على أن تُنْشَر الأخبار المُصَوَّرَة والفيديوهات باسم القُرّاء.