قال عبد الله رمضان، لاعب فرى ستايل، "احنا جينا النهاردة عشان نحتفل بعيد ميلاد صاحبنا سيد ونعمله احتفال كبير بالعجل واستعراض، احنا اتعرفنا على بعض من خلال الفيس بوك، وبالنسبة للعبة دية احنا كلنا بنلعبها وبنتعلم من بعض وديه لعبة ملهاش اتحاد فى مصر ومحتاجين يكون ليها اتحاد ومكان نلعب فيه".
وتابع، "اللعبة ديه ليها 3 أنواع أولها حاجة اسمها ستريت اللى هو اللاعب بيمشى على الحيط والترابزين وتانى نوع الفرى اللى هو اللعب على الأرض والتالتة اسمها سنانك اللى هو بيرفع حصان بوشه وبضهره واللى عايز يلعب اللعبة دية لازم يكون لابس سيفتى فى راسه اللى هى الخوذة وواقى للكوع والركبة".
وأكد، محمد سامى، "احنا بنطالب اننا يكون لينا مكان نلعب وندرب فيه عشان ندخل فى منافسات وننافس اللى يبلعبوا بره لأنهم مش أحسن مننا، احنا لحد دلوقتى بنتعلم الحركات ديه من اليوتيوب من الأجانب وبننفذها هنا فى مصر احسن منهم واحنا منقلش عنهم فى حاجة، محتاجين مكان ندرب فيه وقطع غيار بأسعار مناسبة".
واستكمل عبد الله رمضان، لاعب فرى ستايل، "هدفنا نوصل وننافس الأجانب ونلعب باسم مصر، وفى ناس كتيرة كانوا بيشوفونى بلعب كانوا بيتريقوا عليا بعد كده لما اتحسنت فى اللعب بتاعى الناس بدأت تتجاوب معانا، الناس اللى بتشرب سجاير ومخدرات لما شافونى وعجبهم الموضوع حبوا يتعلموا اهتموا بالرياضة لانها روح الجسد وبجمع الناس اللى بتشرب سجاير وبنركب عجل وهى وسيلة للتخلص من الإدمان والتدخين لأنها بتدى روح تفائل ونظرة أمل جديدة للحياة وبنصح الناس بطلوا التدخين واهتموا بالرياضة والعجل وسيلة مواصلات رائعة وموفرة".
وأردف سيد جمال، لاعب فرى ستايل، "أنا جمعت صحابى النهاردة عشان نعمل عيد ميلادى ونحتفل بيه على طريقتنا الخاصة وديه مش أول مرة نتجمع هنا فى الميدان".
