"شاهندة" فى دعوى خلع: "حماتى كانت بتقولى ليه تجيبى فرخة كفاية وركين"

تزوجت "شاهندة .هـ" من "و . م" منذ 3 سنوات وكان الزفاف بعد الخطبة بـ6 أشهر فقط ،وظنت العائلة أن ابنتهم بدأت حياة جديدة، والحقيقة أنها بدأت رحلة من المعاناة.

لم تمض فترة طويلة على زواجها بل هى مجرد عدة أيام حتى بدأت "شاهندة" تكتشف المفاجآت، حماتها كانت تتدخل فى كل كبيرة وصغيرة والزوج اعتاد مشاهدة الأفلام الإباحية ، ويرفض فكرة الإنجاب.

الزوج كان يحمل مؤهلا متوسطا والزوجة فى الجامعة ودائما ما يطلب منها ترك الجامعة والتفرغ لمنزلها ،التى باتت تكرهه فحماتها دائمة التدخل فى حياتها رغم أنها تعيش فى شقة مستقلة.

تروى الزوجة مأساتها مع حماتها أولا فتقول: حماتى خلت حياتى جحيم، إن جبت كيلو طماطم تقولى ليه تجيبى كيلو كفاية نص، وإن اشتريت فرخة تقولى كفاية وركين، على الرغم أنى مش عايشة معاها وكل واحدة مننا فى شقة مستقلة، وزوجى الحمد لله مستور.. حماتى ضيقت عليا حياتى وسودت الدنيا فى وشى ومع ذلك كنت حامدة ربنا وصابرة.

وتكمل الزوجة: أما زوجى بقى كان بيغير إنى فى الجامعة واكتشفت بعد الزواج إنه كان مدمن مشاهدة الأفلام الإباحية، ورفض فكرة الخلفة مع إنى نفسى فى طفل يقولى يا ماما، وكنت دائما بقوله علشان نخلف بس هو كان بيرفض، وكنت بشتكيله من أمه اللى هى حماتى وما كانش بيسمعلى.

وتضيف: وفى يوم طلب منى الإعتذار عن الامتحانات  ورحت فعلا الجامعة علشان أعتذر ولما رجعت لقيته غير كالون الشقة اتصلت بيه ما ردش عليا، اتصلت بحماتى ما رديتش برده عليا، رحتلها البيت رفضت تدخلنى، استولى على الشقة وعلى كل حاجة حتى هدومى، ورجعت بيت والدى وبدأنا نوسط ناس علشان نحل المشكلة ورفضوا تدخل الأهل وده اللى خلانى ألجأ لمحكمة الأسرة فى العجوزة اللى حكمتلى بالخلع بعدما تنازلت له عن كل شىء.