زرعت شجرة قلت بالحب أرويها
سبقنى قلبى قاللى بكل أمل أسقيها
كبرت مع النسيم حدوته أنا قاريها
ورقها اهداب املى كحل فى عنيها
نام قلبى فى ضلها حلم فى واديها
عنيه بتنام وتصحى بالامل تناديها
قالت من نهر حبك للزهور اسقيها
الورد بلدى فى جنينة حبك راعيها
ضفايرها بمية عينى قلبى شاريها
غنوة واخدانى دوبان فى معانيها
لو غبت عنها يوم احلامى تغنيها
عشق قلبى نادى املى ساكن فيها
هواها سقانى عسل من حواريها
ست الحسن كل الجيران جواريها
نسيمها دقات قلبى بالامل تغذيها
بسمتها نور الامل وردى يناجيها
ومواويل بحب بمبى تنور لياليها
خطفتنى من نفسى ربنا يجازيها
بكل خير قلبى يدعى ربنا يحميها
مصر ام وقد الدنيا صنع اهاليها
