ندى عملت "ميكس" من الأغاني والكوميكس وهتخليك تسمعها بشكل تاني.. صور

كوميك لأغنية مش فارقة معاى

عشرات الأغنيات الرومانسية انتشرت خلال الأيام الأخيرة على مواقع التواصل الاجتماعى فى شكل رسومات تحاكى "الميمز" الشهيرة والكوميكس لتمنح الأغنية معنى مختلف تمامًا، وكان ورائها جميعًا الفكرة المبتكرة للشابة العشرينية ندى صلاح عامر، التي حولت عشقها القديم للرسم إلى فن تسميه "سونجرافيتى" Songraffiti.

اجيبلك سطر الجلاليب من جوا

وتحكى "ندى"، التي تعمل فى الأساس طبيبة للأطفال، عن الفكرة لـ"اليوم السابع": "فكرت فى الموضوع ده من 5 سنين، لأنى كنت دايماً بحب أسمع موسيقى أو أغانى وأنا برسم، و لاحظت إني بشوف في كل رسمة بصمة الأغنية اللي كنت بسمعها، وإن الأغنية بتلهمني بفكرة الرسمة من غيرما انتبه، عشان كدة فكرت فى تحويل كلمات الأغانى لكوميك ساخر، بهدف إسعاد الناس على مواقع التواصل الاجتماعى، من خلال حاجة بحبها وبستمتع بيها، فبدأت أطلب من المحيطين بي الأغاني التي يفضلونها وأرسمها لهم بدون مقابل مادي".

بلاش كده يا استاذ سيد

الانتشارالواسع لرسومات ندى في الأيام الأخيرة سبقه سنوات من الإبداع فتقول "لمدة 4 سنين تقريبًا الموضوع ماكانش معروف قوى برة دايرة معارفى، كانت صفحتى تتابعها أسرتى وأصدقائى ومعارفي ودعموني وقالوا إنهم بيستمتعوا بمتابعة رسوماتى، وكان عدد المتابعين لا يتجاوز الألف متابع، لكن في 2019 اسلوب رسمي والأفكار تطورت والمتابعين زادوا لحد ما وصلوا لـ 40 ألف  متابع حالياً الحمد لله وده كان شئ مفاجئ ليا".

ندى صلاح

وعن طريقة تصميم الكوميك، قالت ندى:" دايماً بجيب الجملة اللي عايزة ارسمها وبسمع الأغنية لحد ما تيجي صورة في خيالي تعبر عنها فارسمها في شكل

Digital drawing (رسم رقمي)، وبعد كده أنشرها على صفحتى بموقع "الفيس بوك". 

ومن العالم الافتراضى إلى الواقع نقلت ندى إبداعها لمعرض فنى وتقول :"عملت أول معرض ليا في شهر اكتوبر اللي فات وناوية أستمر فى الموضوع كهواية وأتمنى أفضل مصدر سعادة للناس دايما".

باين حبيت

من أغنية راجع

لا يقتصر إبداع ندى ومزجها بين الأغنيات والرسم على الكوميكس الساخرة فحسب وإنما أيضًا تحول بعض الأغنيات إلى لوحات تعبر عنها فتقول "مرة في حد طلب مني أغنية والله ماطلعت شمسٌ ولا غربت للحلاج، ودي كانت صعبة عشان هى موجهة للذات الإلهية، وكنت حابة إني اعبر عن مضمونها بشكل لائق، رسمتها في النهاية في هيئة شخص بيدور داخل شمس، و دورانه بيمثل مرور الأيام والشمس شئ دائري لا بداية ولا نهاية له دليل على عدم نهاية حبه لخالقه".

رسومات ندى

رسومات ندى صلاح