أحمد فؤاد نجم، أحد أشهر شعراء العامية فى الوطن العربى، ملأ الدنيا وشغل الناس، كانت قصائده وأغانيه ولا تزال "أيقونات" يرددها الناس حتى الآن، وفى ذكرى رحيله، التى حلت أمس 3 ديسمبر من عام 2013 نتذكر معا معركة شهيرة له مع كوكب الشرق أم كلثوم، بسبب قصيدة "كلب الست".
كتب أحمد فؤاد نجم القصيدة تحت عنوان "كلب الست"، حسب رواية البعض هجاء فى أم كلثوم بسبب كلبها الذى عض أحد المواطنين ويدعى إسماعيل، فتم القبض على إسماعيل والإفراج عن الكلب، وفقًا لقصيدة نجم.
وتعود الواقعة عندما قرر طلبة معهد التربية بالهرم إقامة يوم رياضي مع طلبة كلية الفنون الجميلة بالزمالك، أي في المنطقة التي تقع خلف فيلا أم كلثوم، وعند مشي بعض الطلاب من أمام الفيلا خرج كلب ام كلثوم وقام بعضه، وقرر الطالب الذهاب لنقطة الشرطة وتحرير محضر رسمي، وبالفعل تم تحويل الطالب للقومسيون الطبي الذي أثبت إصابته".
ولكن الموقف الذى استفز الشاعر الكبير أحمد فؤاد نجم هو تصريح الطالب إسماعيل فى إحدى الصحف وتفاخر بـ"عض" كلب أم كلثوم له، فأطلق القصيدة الشهيرة.
ولكن فى أحد اللقاءات التليفزيونية، عندما تم سؤاله عن الواقعة فقال الفاجومى "إنه يعشق أم كلثوم ولا يوجد رجل فى مصر لا يحبها، وأنه كان يتمنى أن يكتب لها أغنية"، مشيرًا إلى أن ثقافته الموسيقية تلقاها من أم كلثوم نفسها، وأحب وكرّه على أغانيها، ككل المصريين، وأن ما أغضبه فى قصة "كلب الست"، هو قرارالإفرج عن الكلب، مشيرًا إلى أنه كان يعرف المحقق بشكل شخصي حيث حقق معه سابقًا في قضايا سياسية. فكتب نجم قصيدته "كلب الست" بعد أن جلس مع إسماعيل الذى وصفه بـ"أغلب خلق الله"، عقب أن زاره فى بيته.
ونص القصيدة :
في الزمالك من سنين/ و في حمى النيل القديم/ قصر من عصر اليمين/ ملك واحدة من الحريم / صيتها أكتر من الأدان/ يسمعوه المسلمين/ و التتر/ و التركمان/ والهنود/ والمنبوذين/ ست فاقت على الرجال/ في المقام و الاحترام/ صيت و شهرة/ وتل مال/ يعني في غاية التمام/ قُصره يعني هي كلمة/ ليها كلمة ف الحكومة/ بس ربك لاجل حكمة/ قام حرمها من الأمومة/ والأمومة طبع ثابت/ جوه حوا من زمان/ تعمل ايه الست؟ جابت/ فوكس رومي وله ودان/ فوكس دا عقبى لأملتك/ عنده دستة خدامين/ يعني مش موجود في عيلتك/ شخص زيه يا اسماعين/ واسماعين دا يبقى واحد/ من الجماعة التعبانين/ اللي داخوا في المعاهد/ والمدارس من سنين/ حب يعمل واد فكاكه/ ويمشي حبه في الزمالك/ والقَيامة و الفتاكة/ يرموا طبعا ع المهالك/ عم سمعه من قيامته/ حب يعمل فيها فله/ بعد ما قلوظ بيجامته/ اشترى حتة مجله/ قول مشي بيقرا ف حكاية/ من حكايات الغرام/ واندماجه في القرايه/ خلا مشيه مش تمام/ ع اليمين يحدف بعيد/ خطوتين ويروح شمال/ لمحه فوكس من الحديد/ قال دا صيد سهل و حلال/ هوب نط في كرشه دوغري/ جاب بيجامته لحد ديلها/ اسماعين بدال ما يجري/ قال يا رجلي رجلي مالها/ بص شاف الدم سايح/ من عاليها و من واطيها/ وياللي جاي و ياللي رايح/ المجلة مش لاقيها/ حبه و اتلموا الظنايا/ اللي هما البوابين/ و الهكايه و الروايه/ قال لهم دا كلب مين ؟/ كلب مين ما كلب مينشي/ سمعه زود حبتين/ قال له واحد فيهم امشي/ اللي جابك عنده مين/ قال دا شارع يا مواشي/ والجميع بيمروا منه/ الى راكب واللي ماشي/ مستحيل نستغنى عنه/ كلمة من دا .. و كلمة من دا/ ظاطو و اترسمت فضيحة/ قول نهايته و القصد من دا/ اسماعين أكل الطريحة/ راحوا قسم الشرطة طبعاً/ و النيابة كفيلة بيهم/ و اترموا ف الحجز جمعاً/ لما ييجي الدور عليهم/ حبة والشاويش أمين/ قال: "سعيد النقشبندي"/ قام غريم عم إسماعيل/ قال له: "محسوبك يا افندي"/ قام سي سمعة يروح معاه/ الشاويش قال: "غور بدمك/ راح تعوصني" .. وفوق قفاه كف طرقع : "داهية في أمك"/ تفتكر يفضل سي سمعة/ قد إيه في القسم نايم/ استضافه الحجز جمعة/ يا بلاش .. آدي العزايم/ شاف بلاوي ما تتحكيش/ من الجماعة المسجونين/ قال يا عالم يا شاويش/ يا نيابة .. يا مسئولين/ خلصوه بعد المناهدة/ جثه من جحر الديابه/ هي حسبة ساعة واحدة/ كان في مكتب النيابة/ قال له ـ مالك يا اسماعين/ قال له ـ زي البمب مالي/ قال له ـ عضك فوكس فين/ قال له ـ سيبني أروح لحالي/ انت شوف سي فوكس يمكن/ خد تسمم غصب عني/ الوكيل قال برضه ممكن/ و الشاويش قعد يغني/ هييص يا كلب الست هيص/ لك مقامك في البوليس/ بكرة تتولف وزارة/ للكلاب/ ياخدوك رئيس/ انت تسوى ف النيابة/ تسعمية م الغلابة/ طب يا ريت يا فوكس كنا/ ولا تربطنا القرابة/ انت فين و الكلب فين/ انت قده يا اسماعين/ طب دا كلب الست يا ابني/ وانت تطلع ابن مين/ بشرى لصاحب الديول/ وللي له أربع رجول/ بشرى لاسيادنا البهايم/ من جمايس أو عجول/ اللي صاحبه يا جماعة/ له أغاني ف الاذاعة/ راح يدوس فوق الغلابة/ والنيابة/ بالبتاعة.
