بالحلم والأمل بدأ حياته رغم صغر سنه وهو طفل ذات الـ10 أعوام، لا يعرف للحياة قيود ولا للمستحيل معنى، فى انتظار حلما توج بداخله منذ البداية إلى اللقاء به، هو الشاب المصرى "محمد ثروت" صاحب الـ24 عاما ابن مدينة المحله الكبرى، والذى أصبح رغم صغر سنه من ضمن اللاعبين الدوليين داخل أمريكا فى عام 2018 .
ويحكى "محمد ثروت" لليوم السابع قصته قائلا: "أنا لعبت رياضات كتير من وأنا عندى 6 سنين مفيش حاجة كملت فيها إلا التايكوندو لأن أول ما دخلت الرياضة دى فى أول يوم مدربى قالى انت ممتاز وأنا هخليك لاعب منتخب مصر، زى ما يكون زرع فيا اسم مكان كنت بتمنى انى أشوفه، وعلقنى بأمل فضلت ماشى وراه لحد ما الحمد لله وصلت ليه، ويمكن دا كان أكبر سبب خلانى كملت فيها هى وبس".
ويتابع:" فضلت فى نادى 23 يوليو لحد ما دخلت المنتخب وأنا عندى 17 سنة، كنت من ضمن تصفيات المنتخب الوطنى فى 2012 و كنت اللاعب الرابع فى المعسكر وانضميت للمنتخب بعد شهر كلاعب فى المنتخب ولحد دلوقتى وأنا محافظ على مكانى فى تصفياته".
وقال:" كانت أول بطولة أشارك فيها باسم المنتخب بطوله العالم 2014 فى الصين وحققت المركز الخامس، وبعد كدة شاركت فى التصفيات الأفريقية 2016 وحققت المركز التانى وفى نفس السنه حققت أول أفريقيا، وده أهلنى انى اشارك فى بطولة العالم فى بيرو 2016 وحققت المركز ال7 عالميا، ودى كانت البطولات اللى شاركت فيها مع الفريق"
وقد شارك أيضا فى البطولات الدولية والعالمية الفردية الأخرى باسم مصر ويضيف " شاركت فى بطولة تونس المفتوحة للتايكوندو 2018 وحققت فيها المركز الأول وحصلت على ذهبيه واتكرمت كسفير مصر، وشاركت فى بطولة international metro open usa2018 وحققت فيها المركز الأول واتكرمت كواحد من أفضل اللاعبين إللى دخلوا أمريكا فى حفل تكريم ولايه نيويورك 2018، وشاركت فى us open وكنت اللاعب المصرى الوحيد الى شاركت فيها وكنت المصنف 17 بين 87 لاعب برا مصر"
وعن المرحلة القادمة يضيف" هشارك فى بطولة New jersey state championship 2019 ، وفى يونيو عندى معسكر مع منتخب المكسيك وهنشارك فى بطولة دوليك فى أمريكا، وفى أغسطس هشارك فى كندا اوبن 2019، وفى بداية 2020 هيبقى أول معسكر ليا مع المنتخب الأمريكى، وبعد كدا هشوف منتخب مصر هيبقى ناوى على ايه بالنسبة لبطولة العالم 2020، لأنى تحت أمر مصر فى أى وقت".
ويلعب ثروت حاليا فى أحد النوادى الأمريكية، وعن الصعوبات التى واجها فى طريقة يقول:" طبعا الموضوع مكنش سهل وكنت فى فترة بطولة أفريقيا بروح أدرب فى القاهرة كل يوم وأرجع، وفى رمضان كنت بروح يوم اه ويوم لا عشان طبعا مفيش معسكرات تبع المنتخب، ودعمنى والدى و والدتى من البداية رغم خوفهم من تأثيرها عليا فى مرحلة الثانوى والمذاكرة، بس أنا كنت حاطط هدف قدامى وعايز أوصله ومقرر انى هدخل كلية تربية رياضية عشان التايكوندو، وكنت دايما بنصفه على أى حاجة فى حياتى ودا كان مسببلى مشاكل كتير".
كما يوجه رسالة للمنتخب المصرى:" نفسى يبقى فى معسكرات خارجية تبع المنتخب لأن لما بنخرج برا بنتفاجئ بالتطور والمراحل الى وصلت ليها الرياضة"، ويختتم حديثة قائلا:" الى بتمناه من ربنا انى ييجى اليوم وأشوف المنتخب المصرى منتخب قوى، وبتمنى أقدر أعمل أكبر مركز للاعبين الرياضيين".
