رمضان شهر طاعة وبهجة وسرور واحتفالات وأجواء لها مذاق خاص، الجميع يتسابق لفعل الخيرات والطاعات، المصريون يحاولون فى هذا الشهر ومع قربه أن ينهون الخلافات والتقرب من بعضهم البعض، أصحاب المحلات والمقاهى والأطفال ينطلقون قبل بدايته لتعليق الزينة احتفالا بقرب هذا الشهر الكريم.
وفى منطقة الحضرة القبلية بمحافظة الإسكندرية تطوع الحاج جمال أحمد عامر وأخوه عبد الحكيم وابنه محمد لصنع فانوس طوله 12 مترا، كانوا قد بدأوا فيه قبل شهر رمضان من العام المنصرم ولكن لم يكن بالحجم الحالى فقد كان طوله 10 أمتار ونصف المتر، وبدأوا العمل على تطويره هذا العام ليصل إلى 12 مترا.
محمود عبد الحكيم يحكى كواليس صناعة الفانوس ومواصفاته عندنا محلات الهرميتال فى الحضرة القبلية بالإسكندرية، والحاج جمال عمى هو صاحب الفكرة، وفى ناس تانى اتطوعت فى الشغل معانا من أولاد عمى وأصحابى منهم: محمد جمال ومحمد محمود ومؤمن رمضان، وكريم أحمد، ده أول فانوس يتعمل فيه صنعة بهذا الحجم السنة اللى فاتت كان فى فانوس طويل قوى فى باكوس بس ما كانش فيه أى صنعة كان نور بس، ما حدش عمل فانوس مجسم بالطول ده أبدا، انا متأكد ان ما فيش حد فى مصر عمل فانوس كامل مجسم من الألومنيا بالحجم ده لكن برة مصر مش عارف بصراحة.
حب يعمل فكرة ماحدش عملها قبل كده تدخل البهجة على أبناء منطقته، وكان بيعمل كل سنة فوانيس صغيرة، وبدأ فى الفكرة قبل رمضان الماضى وعمل فانوس طوله 10 متر ونصف والسنة دى بدأ يطور الفانوس وزود عليه متر ونصف المتر، وكبر الأرضية وخلاها 3 أمتار فى فانوس السنة اللى فاتت 1.50 متر ، وزوده بلمبات الليد، وحتى الآن لم يجمع من أهالى المنطقة جنيه واحد حتى الآن الفانوس لم يكتمل على شكله النهائى وباقى فيه شغل كهرباء كتير ، حتى الآن الفانوس تكلفته وصلت إلى 9 آلاف جنيه، وممكن يصرف حوالى 200 جنيه تانى يعنى ممكن توصل لـ11 أو 12 ألف جنيه التكلفة الكاملة للفانوس.
ووزن الألومنيوم اللى تم استهلاكه فى الفانوس حتى الآن 65 كيلو ده غير اللمبات والكونكتور اللى بيربط الألومنيا مع بعضها وممكن يوصل وزن الفانوس فى الآخر حوالى 70 كيلو أو 72 احنا بنعمل الفانوس فى أرض فاضية وسط المحلات بتاعتنا وإن شاء الله لما هنخلص هنرفعه بواير من فوق العمارات المجاورة، ولما بنجيب كهربائي بياخد اجرته عادى واحنا اللى بنجيب حاجة الكهرباء وهو بييجى ياخد أجرته ويمشى، احنا اشتغلنا 10 أيام قبل رمضان الماضى والسنادى بقالنا أسبوعين بنشتغل فيه وإن شاء الله لسه شغل الكهرباء ما خلصش وأول يوم رمضان هيكون متعلق فى الشارع ومنور.
