أكد الكاتب الصحفى خالد صلاح، رئيس مجلس إدارة وتحرير "اليوم السابع"، خلال برنامجه الإذاعى "صالون مصر"، على إذاعات راديو النيل والتى تضم "ميجا FM، وهيتس، وشعبى FM، ونغم FM"، على ضرورة الاجتهاد فى الدين، وعدم الرضوخ الى بعض الآراء التى يهدف أصحابها إلى التحكم فى مصائر البشر، مستشهدًا بوقائع تاريخية مع صحابة النبى محمد صلى الله عليه وسلم.
وقال خالد صلاح:"أهو إنت المفروض بعد ما تسمع "صالون مصر" أى واحد يقولك الدين بيقول كذا والتانى لأ، أو بيقول كذا وكذا لأ.. أو بيقولك إعمل ومتعملتش ده باسم الدين حط صابعك فى عنيه وأنت ضميرك مرتاح، ليه؟، فى التاريخ كل الصحابة محدش عمل حاجة وقال على الثانية لأ، طالما ممستش العقائد".
وأضاف خالد صلاح:"يعنى إنت مثلًا لما تشوف إن الرسول عليه الصلاة والسلام بعد غزوة الأحزاب، بنو قريظة خانوا الرسول عليه الصلاة والسلام، فالرسول قرر إنه يعاقب بنو قريظة، فالرسول صلى الله عليه وسلم قال للصحابة علشان يعاقب بنو قريظة "لا يصلين أحدكم العصر إلا فى بنى قريظة" يعنى تمشوا محدش يصلى العصر غير لما تعاقبوا بنى قريظة، والقصة طبعًا شهيرة جدًا، لكن "الدوجما" اللى بتسيطر على بعض الناس اللى بيحبوا يتحكموا فى مصائر البشر مبيخليهومش يقرأوا القصة دى قراءة صحيحة، الرسول قالهم "لا يصلين أحدكم العصر إلا فى بنى قريظة"، حلو قوى، الصحابة وهما ماشين العصر أذن، فراح مجموعة فيهم اتوضوا وقالوا إيه هنصلى العصر، راحوا مجموعة تانية قالوا لأ يا جماعة، الرسول صلى الله عليه وسلم قال مش هنصلى غير فى بنى قريظة، بقوا قدام أمر إلهى بأن الصلاة على ميقاتها، وأمر نبوى مقدس فى زمن الحرب إنه لازم ميصلوش إلا لما يوصلوا إلى بنى قريظة".
وأكد خالد صلاح:"صلوا العصر متأخر، لما رجعوا المدينة وخلصوا موضوع بنى قريظة لم يخطئ النبى أيا منهما مع إن كلهم واحد مسمعش كلام النبى وصلى، وواحد سمع كلام النبى ومصلاش، بص الموضوع واصل لحد فين أنت بتتكلم فى أمر نبوى، ومع موضوع الأمر النبوى، كل واحد اتصرف على حسب ما أملاه ضميره".
وتابع خالد صلاح:" وفى الحالتين طلعوا صح، لأن لو كان فيهم حد غلط، كان على الأقل النبى وقف وعاتب من أخطأ لكن النبى معملش كده خالص، ومعتبش حد فيهم، الأمر اللى بيقولك غاية ما أريد أنا أيه إنى أوضحلك أن مافيش أى كهنوت ولا اجتهاد فوق اجتهاد، ومافيش كلام فوق كلام، فيه تنوع فى هذا الدين فيه فهم مختلف".
وأضاف خالد صلاح:"إذا مكناش عارفين نوصل لده من الفقه، أنا ياسيد بوصلهولك من التاريخ، هو إيه النص اللى خلى سيدنا أبو بكر الصديق يحارب مانعى الزكاة، فى حروب مانعى الزكاة اللى سميت حروب الردة، أبو بكر الصديق عمل كده من غير نص، أنت فاهم يعنى إيه من غير نص، وكان لسه النبى عليه الصلاة والسلام وفاته المنية".
وأكمل خالد صلاح:"اليوم حوربت جماعات تشهد بأن لا إله إلا الله بدون نص، ثم يجى عمر بن الخطاب، يشيل سهم المؤلفة قلوبهم المنصوص عليه فى القرآن من غير نص، لنرجع فى زمن النبى الاتنين واحد يصلى وواحد ميصليش، واحد يسمع كلام وواحد ميسمعش، والاتنين صح، والاتنين على صواب".
وقال خالد صلاح:" لو قرينا تاريخ الدين مش بس الفقه، مش بس كتب السيرة، لو قرينا التاريخ بكل تفاصيله هنكتشف إزاى النبى كان عايش مع الصحابة، وإزاى الصحابة كانوا بيفهموا الدين أكثر ما نشوف الدين بس من زاوية كُتاب الفقه أو الفقهاء، أو الناس اللى بتحب تفتى عشان تضيق الدنيا على نفسها وعلى بنى الإسلام كلهم، اصحوا للتاريخ هتندهشوا وهتفهموا أكتر".
