كشف أحمد على، شقيق المقاول الهارب محمد على، تفاصيل جديدة فى واقعة استيلاء "محمد" على أموال يتامى شقيقهم المتوفى "إبراهيم"، ونشر أحمد المستندات التى تدعم ما يقوله، وقال أن "محمد" سرق تركة شقيقه المتوفى دون وجه حق، حيث استولى عليها بموجب التوكيل من والدته، وقام ببيع أملاكه دون إعطاء أبناء أخيه القصر حقوقهم.
وقال أحمد على فى فيديو بثه عبر موقع فيس بوك :"أنا لم أتكلم كلام مرسل ولدى ورق وإثباتات، وهو بالفعل ليس له علاقة بالمجلس الحسبى"، لافتاً إلى أن أخيه إبراهيم الذى توفى فى أول مارس 2016، ترك أولاد قصر، وبعد وفاته قام المجلس الحسبى بتعيين والده ليبيع أملاك إبراهيم وتوزع التركة، حيث تعرض والديه لصدمة كبيرة من وفاة ابنهم، وقاما بعمل توكيل لمحمد لكى يتم تقسيم الميراث، بالإضافة إلى الأموال فى البنوك.
وأشار أحمد على، إلى أن محمد على قام ببيع الفيلات وأملاك أخرى من تركة "إبراهيم"، كنه لم يعط أولاد أخيه أموالهم، الأمر الذى أدى للجوء والدته إلى القضاء ومقاضاته ليهرب بعدها، وتابع:" لدينا كشف بالمستندات بتركة إبراهيم وهى عبارة عن فيلات فى الربوة وأخرى فى بورتو وسيارات وعقار.. الأخ محمد ما ردش عليا.. وطلع فى كليب صغير كده .. قالى أما ماليش دعوة بالمجلس الحسبى.. أنت فعلا مالكش دعوة.. أنا عملت الكليب ده ردا على الناس اللى بتشكك..وفيه ناس قالت أنت ليه ما بتصرفش على ولاد أخوك".
واستكمل: "أنا عندى شركة تسويق عقارى على قدى.. بصرف على قد ما بقدر مش مليونير.. بس بصرف على ناس ليها 25 مليون جنيه دول لو اتحطوا فى البنك.. هيدخلهم اللى يخليهم يعيشوا مرتاحين ويدخلوا أنضف مدارس مش محتاجين أن أنا أصرف بس أنا بصرف على قد ما ربنا بيدهولى".
ورداً على الهجوم عليه قال :"ناس تانية بتقول ليه أنت ما أتكلمتش من بدرى.. احنا مش بتوع فضايح الموضوع كان ماشى أسرى جدا .. وهو مش بيرد وبيعمل بلوكات.. وبدأ يعمل الكليبات اللى بيعلمها ده الغريبة طبعا.. فلازم نرد عليك ونوضح للناس .. ما هو بساطة لو واحد بيعمل حاجة.. يبقى لازم نعرف تاريخه أيه علشان نمشى وراك .. عشان نصدقك لازم يبقى الكلام واضح.. وليه وصلت لكدة وبتتكلم ليه كده، وليه وصلت للحالة ده .. انا ما أتكلمتش من بدرى علشان الموضوع عائلى".
وواصل: "كل واحد عنده مشكلة عائلية يروح طالع فى كليب وينزله طبعا لا.. نخلص من موضوع التشكيك وأن بتشحت، انا مش بشحت أنا بتكلم أرد على فلوس الغلابة وحق ولاد أخوك الميت"، موضحاً "أنا لم أتكلم كلام مرسل ولدى ورق وأثباتات، وهو فعلا ما لوش علاقة بالمجلس الحسبى ، أخ لما توفى عنده قصر وعينوا أبويا والى على القصر ، ويبيع أملاك إبراهيم والمجلس الحسبى يوزع التركه.. والدى وأمى كبار فى السن كان لديهم صدمة وعملوا له توكيل للمجلس الحسبى لكى يقسم الميراث، حتى لو الفلوس فى بنوك يتصرف فى تركه إبراهيم".
وتابع :" احنا شايفين أن الدنيا متيسرة معاك أنت ليه ما بتديش حقوق الناس.. حيث قيامه بالاستيلاء من تركه شقيقه بمساعده والده، ولم يقوموا بإعطاء الشاكية أى مصروفات، وإعطائها نصيبها الشرعى فى التركه- زوجة أخيه- ، انا ما بقولش كلام مرسل.. انت فعلا مالكش دعوة بالمجلس الحسبى والدى ووالدتى عملوا ليك توكيل ومستأمنينك على فلوسهم.. انك تودى الفلوس إلى المجلس الحسبى ويعيشوا فى مستوى زى ما أخوك ما كان معيشهم .. ممكن ترد على الحاجات ده بالمستندات".
واستطرد قائلاً:"ياريت رد وتشكك فى الكلام ده بالمستندات والناس تسأل فى المجلس الحسبى على صحة الكلام ده.. وأنت اضطريتنا أننا نطلع ونعمل فيديوهات" .
