قال الفنان على قاسم، إنه ترك الهندسة وكان خايف يدخل التمثيل، ولكنه حاول كثير في حاجات تانية وملقتش غير التمثيل اللى حابب يدخله، مضيفا: الموضوع مكنش سهل لأن الواحد كان لازم يبقى عارف ناس وعلاقات.
وأضاف على قاسم خلال لقائه في برنامج "صاحبة السعادة" تقديم الإعلامية إسعاد يونس، المذاع على قناة Dmc، كنت بحاول مدخلش مجال التمثيل لأن لما بيكون حد مهندس بيشوف موضوع التمثيل ده بشكل مش كويس ولكن لما دخلت لقيت الموضوع حلو وزى الفل.
وتابع: دخلت مسلسل "لا تطفئ الشمس" بعد ما سألت عن دور كويس فحد قالى في دور بس الكل بيخاف منه فقلت أدخل أعمله عملت كام مشهد وعدوا كويس وبعد كده قالولى لو خايف تكمل امشى من دلوقتى عشان حصل مع ناس قبلك كده، لأن دورى كان من نوعية دور خالد الصاوى في عمارة يعقوبيان، وكان طبيعى أحس بالخوف بس كان لازم أعمله.
وأستكمل، بعد كده جالى مسلسل "طايع" وصورت مع بدايته وخلصت أول رمضان عشان الشخصية بتموت بدرى، وأكتر مشهد بقى في ذهن المشاهدين لما كنت مع مى الغيطى في ليلة دخلتنا وهى بتتجوزنى غصب عنى.
وأشار إلى أنه يواصل حاليا تصوير مسلسل "تحقيق" المقرر عرضه على ممنصة Watch it وهو مسلسل شبابى وعبارة عن 13 حلقة وفكرة غريبة ومختلفة شوية.
فيما قال الفنان أحمد داش، كنت لاعب في انبى في صغرى ولكنى تركته بسبب دخولى التمثيل لأنى بدأت أغيب عن التمارين كتير، والتمثيل بالنسبة ليا جه لما بدأت عملت إعلانات وجالى كاستينج في فيلم "لا مؤاخذه" مع عمرو سلامة وبعد أسبوع كلمنى ودخلت تصوير.
وعن مسلسل البرنس قال، كانت صعوباته بالنسبة ليا أنه شاب مدمن ورحلته مع الإدمان، فكانت صعوبته في انى هامثل تحت تأثير مخدر طول فترة المسلسل وانا مجربتش الإحساس ده ولا أعرفه فازاى هاوصل للشعور ده، فكانت الشخصية تقيلة جدا
وأختتم حديثه، أنا بحب الإخراج وبدأ ميولى يروح كمان للكتابة، فكل اللى عاوزه في الفن إنى أقدم حاجات تكون صادقة وحقيقة وتكون لمسانى فعلا سواء كنت ممثل أو مخرج أو سيناريست.
تم أضافة تعليقك سوف يظهر بعد المراجعة