استمرارا لتغطية "تليفزيون اليوم السابع"، لكافة فعاليات مهرجان الجونة السينمائى فى الفترة من 23 لـ31 أكتوبر الجارى، التقت كاميرا تليفزيون اليوم السابع، مع الزميلة شروق وجدى، تصوير الزميل محمد شيتوس بالمخرج ساندرو كنعان مخرج فيلم الخد الآخر.
وعن فكرة قصة الفيلم قال كنعان: "استوحيت فكرة الفيلم عن قصة حقيقية حصلت في مدينتي عن طفل عنده 6 سنوات في كلاب اتهجمت عليه واتشوه كاملا .. فأنا شوفت صور الطفل فيما بعد وقعدت أفكر كتير وماعرفتش أخرج الفكرة من دماغى .. بالذات فكرة أن فى ناس لو حصلهم أى إيذاء جسدى ممكن يعدوها لكن لما يكون ابنك أو بنتك الموضوع مختلف تماما.. فضلت أفكر وسألت ناس كتير وأختى كانت لسا مخلفة وسألتها ولقيت رد فعلهم شر جدا فأنا حسيت أن في حاجة تتحكى أوى في القصة دى بالذات رد فعل الأب والأم على طفل هما روحهم فيه".
وتابع: "طبعا أنا خدت بس عناصر من القصة الحقيقة لكن حاولت إنى أروح بخيالى لشخصية أنا أقدر أحكى قصتها، شخصية قريبة من فكرى أكتر وهنا كان الشخصية كانت ليها أبعاد مختلفة جدا وحاجات متناقضة فكنت محتاج ممثل محترف جدا يعملها ومن هنا تواصلنا مع أستاذ طارق عبد العزيز".
وعن اختيارة لطارق عبد العزيز قال: "هو كان متعاون جدا وقبل الدور وهو نشيط جدا كممثل في الأفلام القصيرة وانبسطت جدا في التعامل معاه حسيت إنى بتعامل مع نجم طبعا لكن بسيط ومتواضع ".
وعن أصعب مشاهد الفيلم، قال كنعان: "وأنا بصور في المستشفى كان لازم نصور بالليل خالص، والمستشفى كبيرة جدا والموضوع كان مرهق جدا.. وطبعا التعامل مع كلب دى كانت حاجة صعبة.. كان متدرب كويس جدا وصورنا معاه 4 ساعات بس .
وعن رد فعل الجمهور على أول عرض للفيلم قال كنعان: "لحظة هتفضل معايا العمر كله.. والجمهور محترف جدا من النجوم وانبسطت جدا من رد الفعل وأتمنى نستمر على ده ."
