قال الموسيقار هاني مهنا، إنه فوجئ بصعود حمو بيكا وعمر كمال وحسن شاكوش المسرح والغناء في حفل زفاف ابنته هنادي، وتابع قائلاً: "أقسم بالله أنا المفاجأة خلتنى مبلم ولا اتحركت من مكاني كمان، واللى دعتهم وغنوا قمت سلمت عليهم وتفاعلت معاهم ورقصت معاهم، أنما هما أنا اتخضيت ياترى مين اللى جابهم.
وتابع قائلا: "والله ما شوفتهم خالص إلا وهما على المسرح، وفكرت أنزلهم على المسرح، هيبقي مصيبة لو بعت حد من الأمن ينزل حمو بيكا وهو في إيده الميكروفون ولو قال كلمة مش لطيفة هتحصل خناقة في الفرح وتبقي مصيبة.
وأكد هانى مهنا، أن نقابة المهن الموسيقية تسرعت في إصدارها بيان تستنكر فيه حضور حمو بيكا لحفل الزفاف، وتابع قائلا:" كان المفروض يرجعولى الأول وكان الاستاذ هاني يكلمنى زى ما بيكلمنى فى أى يوم"، وتابع قائلا: أنا كنت عازم هاني شاكر بس كان عنده حفله فى الأوبرا، وازاى أكون عازم هاني شاكر وأنا عارف إن في خلاف بين حمو بيكا والنقابة وأعزمة، مش معقول طبعا.
وأضاف الموسيقار هاني مهنا قائلا: المفروض كان يكلمني يعرف حيثيات الموضوع، بدل ما يصدر بيان يستنكر، مش كده، وبعدين مع احترامي أنا تاريخي النقابي من الدرجة الأولى"، وتابع قائلا: في بيان النقابة مزايدة عليا لأن لو حد هيدافع على النقابة يبقى نقول أن هاني مهنا يدافع الأول وبعدين الآخرين، لأنهم هما شافوا النقابة في دلوقتى في السنوات دي إنما أنا شوفت النقابة من أول إعادة تأسيسها في 78 وبدافع عنها من ساعتها، ففي مزايدة حصلت وتسرع.
