احتفلت أسرة ممدوح السبيعى المعروف بـ"بيج رامى" الفائز بأهم بطولة كمال أجسام في العالم بلقب مستر أولمبيا، والتي أقيمت في الولايات المتحدة الأمريكية.
وقالت والدة بيج رامى في برنامج مساء دى أم سى: "ماكنش خايف وباس رجلى وأيدى ورأسى قبل السفر وقالى ادعيلى يا أمى، وإن شاء الله عمر اللقب منا هيخرج عن مصر وقلتله افرح يا حبيبى زى ما عبد الحليم بيقول زى الفرحان بنجاحه وغنيت له، وكنت مطمئنة أنه هيكسب لأن رامى ده حاجة من عند ربنا ومعايا 7 بنات و4 بنات وهو قبل الأخير في ترتيب الأولاد".
فيما قال محمد شقيق رامى: "رامى واخد نصيب الأسد في حب أمى وكل اللى كان بيعمله كان بياكل كويس جدًا وبيحافظ على نفسه".
من جانبه قالت زوجت بيج رامى: روتين رامى صعب أي حد يتحمله وماشى بسيستم معين ومقيد بأكل معين وبياكل 5 لـ6 وجبات يوميًا خلال 8 أشهر ويتمرن مرتين في اليوم، وكل شيء ماشى مع رامى بدقة كبيرة لو نام ساعة زيادة أو قصر في شيء معين كان يقولى لما تشوفنى مقصر في حاجة رجعينى وحسبينى علشان أخلى بناتى فخورين بيا".
وأضافت زوجة بيج رامى: "أول حاجة سألنى عليها بعد التتويج بالبطولة قالى بناتى مبسوطة وقالوا إيه، وقالى حلم الـ9 سنين اتحقق والبنات يكونوا مبسوطين أننى أنا أبوهم".
وعن مشواره قالت زوجة بيج رامى: "أول ما بدأ لعب كمال الأجسام قالى ده شغلى وأكل عيشى فلازم أكون بضحك لأى حد يتصور معايا، ومتفهمة جدًا كل شيء وتلهف كل الناس عليه لكنه محترم ويقدر كل شيء بحساب، وكان بيقولى قبل السفر عاوز أبسط الناس وأفرحهم وخايف أكسر قلبهم وعاوز بناتى تكون فخورة بى".
وتابعت: "رامى بعد ما جاله فيروس كورونا راحت بطولة إسبانيا وحلم أولمبية كان راح منه وكان الأمل البسيط أن يجيلوا دعوة وبعد ما تخلى الرعاة عنه قالى متخافيش ربنا عمره ما هيسبنا، وبالفعل جت له الدعوة وشارك وخد البطولة علشان هو تعب جدا".
تم أضافة تعليقك سوف يظهر بعد المراجعة