ينتظر الرجل بفارغ الصبر أن تحين اللحظة المناسبة وتسمح له الفتاة التى يشعر نحوها بإعجاب بأن يقضيا بعض الوقت معًا فى الخارج، ويحاول أن يبدو فى هذه المقابلة بأفضل حال ممكنة لإقناعها بالارتباط به، ولكن أحيانًا ما يرتكب بعض الأخطاء التى تجعله يفسد الأمر ويجعل الفتاة تكون فكرة سلبية عنه.
لهذا طرحنا سؤالاً على مجموعة من الشباب والفتيات حول ما يجب على الشاب فعله أو تجنبه فى المقابلة الأولى مع الفتاة التى يشعر نحوها بإعجاب.
"اهتم بالتفاصيل وخليك جنتل"
"أمل.م" صاحبة الـ 25 عامًا قالت إنه يجب على الشاب حين يخرج لأول مرة مع فتاة، خاصة وإن كان يحبها أن يعاملها معاملة الجنتل مان قائلة: "احرص على فتح باب العربية، السلام والترحيب بيها مع ابتسامة، ما يديهاش أوامر زي أقعدي كلي واشربي، الكلام ده بيفرق معانا جداً" .
وأضافت: "الرجالة مش بياخدوا بالهم من التفاصيل زينا، إحنا تقريباً بنعمل كشف هيئة حتى لو مش باصين عليه، فلازم ياخد باله من أفعاله خصوصاً مع الناس اللي أقل منه زي الويتر والسايس عشان متاخدش عنه انطباع وحش".
المقابلة الأولى
"متسألهاش هنقعد فين"
"أما محمد. م" صاحب الـ 34 عامًا فقال، إن الفتيات يفضلن الرجل القادر على اتخاذ القرارات قائلا: "مينفعش تضيع الوقت في سؤالها هنقعد فين وهناكل ايه وهنشرب ايه، حاول تفاجأها وتكون عارف بشكل مسبق هي بتحب ايه وتعمله".
وتابع: "لو حبيت تسألها خدها على أول مكان تقترحه ومتحاولش تجود من عندك لأنها هتضايق وتحس أنك بتستهلك طاقة ومجهود عشان تبسطها"
"اتعامل بطبيعتك"
"أحمد .م" صاحب الـ 38 عامًا قال: "أوعى تتصنع وتحاول تبان إنك غني أو تتكلم بطريقة مش بتاعتك، هتقفشك وهيبقى شكلك وحش"، وأضاف: "لو مادياً مقدرتك على قدها ونويت تعزمها حاول تحط قدامها خيارات تختار بينهم ومتكونش أعلى عن إمكانياتك، عشان ميحصلش مشكلة وتخلي شكلك وحش".
"متبصش لغيرها وهي قاعدة معاك"
"سناء. ح" صاحبة الـ 28 عامًا قالت: "اسوأ أنواع الغلطات اللي ممكن تحصل إنه يبص على بنت غيرها، حتى ولو كانت واثقة من نفسها وجميلة هتزعل"، وتابعت: "لو خارجين في مكان بيتجمع فيه صحابه وكان فيهم بنات يحاول أنه ميرغيش كتير مع واحدة منهم قدامها، وإياك تتوشوش مع واحدة منهم ولو ثانية، كدة هتبقى حفرت قبرك بإيدك".
متبصش لحد غيرها
"متبصش في التليفون كتير"
أما عن المواقف الطريفة في ذلك الموضوع فقال عنها "محمود . م" صاحب الـ 39 عامًا، إنه في إحدى العزومات وكانت أول مرة يقابل فيها محبوبته علقت على تمسكه بالهاتف طوال وقت جلوسه في المطعم، وتابع: "مكنتش واخد بالي، طلعت كانت بتحسب أنا بقالي قد ايه ماسك التليفون، هي دلوقتي بقت مراتي، ولحد دلوقتي مش ناسية لي الموقف ده".
متمسكش التليفون كتير
"متتعداش حدودك معاها"
وعن طريقة التعامًال في المقابلة الأولى نصحت عائشة. ر صاحبة الـ 34 عامًا الشباب: "أوعى تتعدى حدودك معاها، مش مسموح تمسك أيدها أو تعدل حاجة من لبسها أو تمد ايدك بأي شكل طالما هي مسمحتش بده"، وتابعت: "معرفة حدوده وتعامًاله معها بأدب مش شرط يخلي الخروجة دمها تقيل قد ما هيكسب احترامها وثقتها فيه بعد كدة، وهيزود فرص الحب والارتباط بينهم".
تم أضافة تعليقك سوف يظهر بعد المراجعة