أنا وفنجان القهوة
بنبص ع الشارع
أهلي ناموا من دقايق
أهلي مش حاسين مشاكلي
أهلي لولا اللمة آخر الليل
كانوا نسيو شكلي
مشاكلهم بتفرق عن مشاكلي كتير
مشاكلي من وأنا عيل وسني كبير
ولما شافوني بضحك قبل ماينامو
ماظنوش ان انا زعلان
سابوني وحيد
بابص ع الشارع
انا وفنجان القهوة
انا وفنجان القهوة
اصحاب
بيعرف عني اكثر من جميع الناس
بيسالني عن الدنيا وعن احوالي اخر الليل
ويسألني عن الحلم الي هد الحيل
وعن اخر غُنا لمنير :
ايديا ف جيوبي وقلبي طِرِب
سارح ف غربة بس مش مغترب
وحدي لكن ونسان وماشي كدة
بابتعد ماعرفش او بقترب
أنا مجنون وهوا عارفني بطباعي
وعارف ان انا مجذوب
وعارف ان انا عاصي لكن بتوب
وبارضا بقسمة المكتوب
وعارف ان انا فاشل وصايع برضه من يومي
وعارف ان انا خجلان وعرقي بيجري ف هدومي
وعارف ان فيه واحدة صورها مالية البومي
وعارف ان انا سكران بشوق باين
وعارف ان انا مصاحب صديق خاين
وعارف ان انا فلاتي
وليا ف كل سيما بنت
وعارف ان انا نفسي
اقابل واحدة تملكني
واكون زوجها وفارسها
تكون البحر
اكون موجها ونوارسها
تكون بستان
اكون شوكها ونرجسها
وعارف ان انا طيب
واني بسيط
واني بطبعي قلبي عبيط
باصدق رعد ومازنجر
واصدق ان فيه ماجد
وفيه بكار
واصدق ان فيه طيب بيهزم كافة الاشرار
واصدق ان فيه واحدة
عينيها نصها جنة
وباقي عينيها صهد ونار
فبالامانة.. هلاقي مين يشيل همي؟
ويسمعني
ويعرف ان انا كداب يصدقني
باعيط دمعي ينزل في
وباضحك يبتسم زيي
هلاقي مين يكون طيب معايا بجد
وباقسي عليه
هلاقي مين بدون طلبات يسيبلي ايديه
هلاقي مين يكون صاحبي الا هو .. فنجان القهوة
