عمر أديب: "ألمانيا بدأت تفتح الدنيا تانى.. لكن الناس نزلت بالتدريج"

علق الإعلامي عمرو أديب على عودة الحياة إلى ألمانيا مرة أخرى بعد الحظر التام الذي عانت منه بسبب فيروس كورونا المستجد، وقال: "الناس كانت فاكرة أن أول ما الدنيا هتتفح في ألمانيا الناس كلها هتنزل الشارع مرة واحدة، لكن لا الناس كان عندها وعي كبير جدا ومراعيين اجراءات الوقاية اللازمة والإجراءات الصحية عشان العدوى متظهرش تاني، المدارس عندهم هتفتح واحدة واحدة والمحلات التجارية بدأت تفتح، حتى لو الناس منزلتش بس ده مؤشر مهم جدا".

وأضاف عمرو أديب: "سنغافورة من كام يوم كانت قالت إنها سيطرت على الفيروس تماما وبدأت تفتح الدنيا والناس تنزل الشارع عادي، لكن من وقت ما أعلنوا أنهم هيفتحوا الدنيا، يوم سجلوا 700 إصابة ويوم 900 والنهاردة سجلت أكتر من 1400 إصابة، فيروس كورونا المستجد ده خبيث، والناس المفروض تاخد بالها أوي وتبقى حريصة في كل حاجة بتعملها، وحتى لما مصر الدنيا تستقر فيها، المفروض كل حاجة تبدأ فيها واحدة واحدة".

وقال عمرو أديب: "الناس للأسف لما تلاقي الدنيا هديت في البلد وتبدأ تفتح الدنيا، تلاقي واحد مبيظهرش عليه أعراض الفيروس، يقوم عادي كل اللي حواليه، واللي حواليه بيعدوا اللي حواليهم، وهكذا لحد ما ينتشر تاني، وللأسف محدش فاهم حاجة ومحدش عارف الأجسام المضادة دي بتقعد قد إيه، وتيجي تسأل الصداع ده هنخلص منه إزاي، أقولك لازم المصل الواقي منه، وسويسرا بتقول إنها في أكتوبر الجاي هيبقى عندها مصل من الفيروس ده، والعالم هيبدأ ياخده بعد التجارب في يناير".

وأضاف: "إسرائيل بتقول أنها هيبقى عندها لقاح لفيروس كورونا في شهور قليلة، وعلى فكرة إسرائيل أخذت المركز الأول في الإجراءات الصحية في العالم، وبدأت تفتح المجتمع بتاعها للعمل والمدارس وكل شىء، وتحب أو تكره إسرائيل، هما عندهم رعاية صحية هناك كبيرة أوي، وكدى يبقى في 3 دول هما اللي شغالين على اللقاح، سويسرا وبريطانيا وإسرائيل".