"يا بلح ابريم يا سمارة".. تاجر تمور: الموسم السنة دى كويس جدًا رغم كورونا

أيام قليلة ويطل علينا شهر رمضان الكريم، وفى هذه الأيام المباركة تتزين الأسواق وتمتلئ بما ألذ وطاب من أنواع التمور المختلفة، والتي لا تقام مائدة إفطار من دونه، في منطقة وسط البلد بالقاهرة الفاطمية كان لـ"اليوم السابع" لقاء مع أحد بائعي التمور ليوضح أنواعها وأسعارها هذا العام.

بلح رمضان 

قال حيدر محمد على تاجر مواد غذائية: نستعد لموسم بلح رمضان من أول شهر رجب ونبدأ في الشغل الفعلى من أول شهر شعبان، ونأتى بأنواع البلح المختلفة من الوادى الجديد، أسوان، والأقصر.

حيدرمحمد على

وتابع حيدر: أنواع التمور كثيرة، وأسماء أكثر منها السكوتى، البرموتا، الشامية، الكاشوكا" أما عن أسماء البلح التي يطلقها المصريون على أنواع التمور المختلفة فقال" السنة دى مافيش أسماء للبلح زى كل سنة،لا لاعبين كورة ولا ممثلين، السنين إللى فاتت كان البال رايق وكنا بنفكر في أسماء موضة للبلح لكن السنة دى ربنا يعديها على خير ".

بلح رمضان 

وعن أسعار البلح قال :أسعار البلح مختلفة منها الشعبى ويبدأ من 10 جنيه إلى 25 جنيه للكيلو، وبعدين تعلى الأسعار تدريجىا حتى 40 جنيه في الكيلو للبلحة عالية الجودة واسمها برامودا، ودى بتتنقع في اللبن أو الماء وما بيتحطش فيه سكر لأنها نظيفة جدًا، أما البلح الطرى بنجيبوا من الوادى".

بلح رمضان 

وأضاف تاجر التمور"على الرغم من انتشار فيروس كورونا  إلا أن الموسم السنة دى ماشى طبيعى جدًا، في إقبال على الناس لشراء البلح زى كل سنة خاصة أن الأسعار مناسبة، كمان إحنا هنا كل العاملين في المكان ملتزمين بالكمامة والجوانتى عشان الناس تثق فينا ومنتجنا وتشتريه".

بلح رمضان

وتابع" أحنا بنفتح من الساعة 9 الصبح بنشطب على 4:30 بعد العصر عشان  نقفل الساعة 5 بالظبط، وهى طبعًا الفترة دى أثرت علينا في شغلنا لأن مدة الشغل بسيطة مش زى كل سنة، لكن احنا لازم نلتزم عشان نحفظ نفسنا ونحفظ غيرنا".

عبد العزيز قمر

أما عبد العزيز قمر أحد المواطنين فقال" سوق البلح السنة دى اسعارة كويسة جدًا ومناسبة وعلى الرغم كده فبسبب ظروف البلد الناس بتشترى كميات أقل من السنة اللى فاتت، وأنا بجب أجيب البلح الطرى واسعاره السنة هي نفس أسعار السنة اللى فاتت يبدأ من 15 إلى 25 جنيه".

عبد الغفارشوقى

وقال عبد الغفار شوقى مواطن" الموسم السنة دى كان متوقع له أزمة لكن ما حدث أن كل الأنواع متوفرة والأسعار حلوة ومناسبة، أنا بجيب بلح السكوتى الكيلو بـ40 جنيه" وتابع" هما هنا لابسين جوانتى وكمامة وده بيخلينى متطمن وأنا بشترى، والتعقيم دور المدام في البيت".

 
سيد عميرة

ويرى سيد عميرة مواطن أن سوق البلح هذا العام تأثر بفيروس كورونا ماديًا بشكل كبير، وعن جودة البلح قال:"الأفضل اشترى بلحة لحمها تخين بيكون أطعم ومسكر لكن البلحة الرفيعة بتكون ماسكة جدًا، والأفضل البلح الطرى بيكون طعم ومفيد جدًا".

صلاح وجدى

أما صلاح وجدى مواطن فقال: "البلح نوعين في الأبريمي إللى بننقعه في الميه مع المكسرات وده بناخده قبل الفطار عشان مفيد جدًا وبيعوض الجسم عن السكريات إللى فقدناها في الصيام، أما التمر هو البلح الطرى وممكن يتاكل لوحدة أو مع الفول السودانى، والاثنين مفيدين جدًا للجسم، لكن الموسم السنة دى مش زى كل سنة بسبب حظر كورونا، وده على دول العالم كله مش مصر بس، لكن بنقول ان شاء الله الأمور تتحسن قريب".

بلح رمضان (3)

بلح رمضان (7)

بلح رمضان

بلح رمضان

بلح رمضان 

بلح رمضان 

بلح رمضان 

بلح رمضان