حققت إعادة عرض حلقات مسلسل "لن أعيش فى جلباب أبى" للفنان الراحل نور الشريف والفنانة عبلة كامل على قناة Dmc، حالة من الانتشار القوى على مواقع التواصل الاجتماعى وتصدر تريند محرك البحث جوجل، رغم أنه يعرض بعد 25 عامًا، الا أنها أحدث ضجة كبيرة خاصة بعد عرض الحلقة التى تضمنت فرح "سنية" ابنة عبد الغفور البرعى، وكيف ظهرت البساطة التى يشعر بها المشاهد دون أى معالم تجميلية.
وكشفت الفنانة وفاء صادق، عن كواليس مسلسل "لن أعيش في جلباب أبى" في إحدى اللقاءات التليفزيونية السابقة، قائلة، إن نجاح المسلسل بسبب الحالة الحلوة التي وصلت لنا عن طريق المخرج أحمد توفيق والفنان نور الشريف والفنانة عبلة كامل وسهير البارونى، لأنهم وصلوا لينا أننا عيلة بجد مش موضوع اننا بنعمل مسلسل وخلاص.
وتابعت: "كنا بنحاول نبوظ اللبس اللى هنظهر بيه عشان يبان في أسوء أشكال، واللى ساعدتنا في ده الفنانة سهير البارونى لما جابت معاها ورد وخرز ومسدس شمع عشان نلزق بيه الحاجات دى في اللبس فيظهر بأنه بلدى أوى، وأستاذ نور الشريف كان معا كاميرا خاصة به كان مصورنا كلنا صور لا تنسى.
وأضافت: "الأكل اللى كان موجود في "فرح سنية" كله أكل بيتى لأنه معمول فعلا في بيوت عبلة كامل وسهير البارونى وفنانين آخرين، والمخرج أحمد توفيق قرر ميكونش في غداء في يوم التصوير ده عشان نكون جعانين وناكل بجد زى ما طلعنا في الكاميرا.
وعن العمل مع عبلة كامل قالت: فظيعة بجد وكانت أكنها أمنا بالظبط مش مجرد تمثيل، وفى مرة، قررت أنها هتجيب لينا الغداء من البيت وميكونش في غداء تبع الإنتاج، وكانت المفاجأة أن كل الأكل عبارة عن بتنجان بكل أصناف سواء مسقعة أو محشى وغيره، وكانت طعمه جميل جدا، ولكن بسببه كلنا نمنا ساعتين، واضطر المخرج أحمد توفيق يصحينا بعد كده.
