استنكرت الإعلامية رضوى الشربينى منع المحجبات من نزول البحر فى بعض القرى السياحية، عبر حسابها بموقع تويتر، قائلة: "يعنى إيه واحدة رايحة تنزل بحر يتقال لها لأ مش هينفع علشان إنتى محجبة! رايحة تسهر مع جوزها فى حتة تتمنع من الدخول علشان هى محجبة !تيجى تشترى وحدة سكنية فى مكان المفروض إنه راقى يتقال لها لأ مش هنبيع علشان إنتى محجبة ! زى ما الست اللى مش محجبة حرة.. الست المحجبة كمان حرة".
رضوى الشربينى
وكانت الإعلامية رضوى الشربينى أكدت أن فكرة منع المحجبات من نزول البحر وحمامات السباحة فكرة مقززة وغير مقبولة، مشيرة الحجاب فرض ولا بد من احترام حرية المحجبة وغير المحجبة.
وكتبت رضوى الشربينى، عبر حسابها بموقع تويتر: "جتلى معلومة دلوقتى إنه الشواطئ بتمنع المحجبات من نزول البحر وحمامات السباحة، والحقيقة دى فكرة مقززة جدا وغير مقبولة".
وأضافت: "أولا لأنه دينيّا الحجاب فرض حتى لو كنا تاركينه، ثانيا زى ما بنحترم حرية الست أو البنت غير المحجبة.. المفروض نحترم حرية المحجبة ونشجعها عليه مش نكرهها فيه!.
يشار إلى أن الإعلامية رضوى الشربينى ردت على الداعية عبد الله رشدى بشأن عمل المرأة والزواج بعد إتمام الدراسة من قبل وأن دورها فى الحياة هو رعاية أطفالها وزوجها، موجهة حديثها إلى رشدى قائلة عبر حسابها الرسمى على موقع التواصل الاجتماعى تويتر: "إلى السيد الأستاذ المحترم اللى بيقول إن المرأة خُلقت للبيت وتربية الأولاد ورعاية جوزها فقط.. ممكن تقولنا بس فى حالة إن الزوج تعسر لأى سبب لا قدر الله ومقدرش يشتغل.. تنزل هى تشتغل بداله وتبقى زوجة جدعة، وفى الحالة دى هيبقى الشغل حلال؟ ولا تتطلب الطلاق وتبقى زوجه ندلة عادي؟".
