خرج أولادى من المدرسة مع اندفاع وحماسة مريبة (شفتى يا ماما اللى حصل) خير استر يا رب، رددت بصوت مسموع: هل حان ميعاد دفع قسط مصروفات المدرسة؟، يظهر على وجه أولياء أمور الطلبة تعبير معروف متزامن مع موعد دفع المصروفات.... رد ابنى (لا يا ماما متقلقيش أصلى شفت فيديو محصلش اليوتيوبر الأمريكي ده مش فاكر اسمه المهم جاب طيارة هيلكوبتر ترفع عربيته الغالية تحفه أصلا فوق أوى فى الهوا ورمها فجاءة على الأرض نزلت ميت حته وهو قاعد يصورها ويتفرج عليها اصلها موديلها قدم سنة).
رديت باستغراب؛ (لا حول ولا قوة إلا بالله وبعد استفسار عن صلاحية السيارة وانتقادى للتصرف الفج بشدة.. كان من الواجب أن يتم التبرع بها لمحتاج أو لمؤسسة خيرية تفيد الناس وكمان هيلكوبتر ده مكلف بقى)😁مع ابتسامة بلهاء....
رديت بنتى بسخرية😒😒 (يبيع ايه ده كفايه ملايين المشاهدات على الفيديو ده يجيبوا فلوس عشر عربيات جديدة).
احتدت فى الرد😡 إن حساب الله عسير مع من يفرط فى نعم الله مع محاضرة عن التواضع وأهميته فى حياة الفرد والمجتمع
بنتى قاطعتني؛؛؛؛( طيب بلاش ده ياماما شفتى جانا صحبتى نزلت فيديو على (tic toc) جايب كام مشاهده اهى دى لو استمرت كده هتبقى مليونيره فى شهور)..... ومع استفسارتى البلهاء!!!! ما علاقه اليوتيوب بكسب المال ؟
رديت بنتى تحاول تفهمنى (ياماما اليوتيوب بيدى فلوس للناس على فيديوهتها لو جابت لايك او مشاهدات كتير).
😳😳مع اندهاشة قوية ...وبعد قليل من الصمت وتفكير عميق ...
كان ردى؛ طيب يا حبيبتى اول منوصل البيت تكلمى صحبتك تفهمى منها نعمل فيديو ازاى على اليوتيوب عشان عايزه ابقى انفلونسر😅😎
تم أضافة تعليقك سوف يظهر بعد المراجعة