بص بَصه علىٰ اللي فيا
بدون ما أقول ولا كلمه
سنين عُمري عدت عليا
هتحكيلك دموع عنيا
هتلقىٰ عندي قلب شارد
كُله ضغوط الحزن زايد
كإنه معمول فيه العَمل
لكن جواه ذرة أمل
أملُها في الحياه تعاند
طرحت الذرة في قلبي طِير
طَل بجناحاتُه فارد
قولت أنا منغيرهم غير
هبدأ ارمم فيا كتير
هصلح جوايا الحاجات
واكتب عني كتير حكايات
هنسىٰ خلاص كُل اللي فات
الماضي بالنسبالي مات
هشيلُه في خانة الأموات
رسمت ليا خَط سير
ولما شافوني عالي بطير
بصولي حتىٰ في الجناحات!
فوقعت وروحي اتكسرت
وكمان حياتي اتعصرت
قلبي ملاه تاني الهموم
أول مرة أكون مهزوم
أفكاري كمان اتحجرت
السبب كان الحياة
عُمرك ما تلاقي النجاة
مع ناس باعت واستكثرت
تكونلك منبع الأمان
من كُتر ضربات الجزاء
الشِبَاك كانت في قلبك
فالمشاعر اتقطَعِت!
عيونكُم فارغة عاوزه كتير
باصين في كف إيد الغير
عاوزين دايمًا ليهم تَقدير
أنا كان كُل حِلمي أطير
لكني وقعت واتعجزت!
مش جاي اشكي لكني هقول
مبقاش معايا غير قروش
يلزموكوا في حاجه دول!
عيني خلاص بقت مَعميه
والجزء اللي عايش فيا
حالته بقت شبه عَربيه
والحياة هي اللي سايقه
أقصىٰ هدفها تهيني بذوق!
تم أضافة تعليقك سوف يظهر بعد المراجعة