إبراهيم فايق: لو حاورت محمد صلاح هسأله سؤال واحد : أنت إزاى كده؟.. فيديو
أجرى تلفزيون اليوم السابع لقاءا خاصا مع الإعلامى إبراهيم فايق، والذى أكد أنه يهتم فى المقام الأول برأى الجمهور، وضرورة أن يمثل رأى الناس.
وقال عن أبرز الحلقات التى تفاعل معها الجمهور، " افتكر أن الحلقات اللى فرقت مع الناس، هى حلقة منتخبنا الوطنى وقت أن كان تحت قيادة كابتن حسام البدرى، الناس دائما بتكلمنى على الانترو، وبيفتكروا أنها ارتجالية، لكن أنا ببقى مذاكر الكلام، وبحمل نفسى مسئولية أنى أقول الكلام اللى الناس عايزة تقوله، المنتخب وحش، بالتالى لازم أعبر عن الناس وأمثل أرائهم".
وعن محمد صلاح، قال فايق خلال اللقاء الذى قدمه وأعده رامى الحلوانى، "أنا لو عندى مساحة أحاور محمد صلاح هسأله سؤال واحد بس، هسأله أنت إزاى كده ووصلت هنا إزاى؟.
وتابع : مش هساله عن ماتش كورة ولا جول جابه، هقوله أنت كده إزاى؟، محمد ابن مصر، وده مختلف عن أى لاعيب تانى جه فى تاريخ مصر، واحد أكل أكلك ونام نومتك وأتمرمط زيك، لازم نفهم إزاى وصل لكده، محمد صلاح كان بيقول إنه بيطلع يجيب كشرى، وبالباقى شطة عشان يشبع، عايز أفهم إزاى عمل كده؟.
وأضاف : مر على مصر لاعيبة كبار وأتقل، لكن الفكرة دائما فى الدماغ ، وأنا واثق أن محمد صلاح مش هيبطل كرة قبل 37 و38 سنة، لان دماغه مميزة، أنا قابلته قبل كده، هو إنسان محترم جدا، وخلوق، ومهذب، وعلاقتى به طيبة، لما جالى جلطة فى الشريان الرئوى، اتصل بي، وسال علي، وقالى أنا ببقالى 4 أيام بحاول أوصلك ،أنا كنت هجيلك".
