يحتفل الشعب المصري في يوم 4 نوفمبر من كل عام بعيد الحب المصري، ذلك الذي يحرص فيه كل حبيب على تقديم الهدايا لشريك حياته تعبيرًا عن حبه له وامتنانه لوجوده في حياته، وبمناسبة عيد الحب المصري سألنا البنات إزي تعرفي إن شريك حياتك مش بيحبك؟" وتنوعت إجابات الفتيات عن السؤال، وخلال السطور التالية سوف نرصد لكم بعض الإجابات الخاصة بالفتيات من خلال تجاربهن.
خناقات زوجية
قالت شروق عادل لـ "اليوم السابع": "الشخص من أول العلاقة بيكون واضح جدًا، وأنا كبنت لازم أخذ بالي من التصرفات، وكل واحدة فينا كبيرة بقدر كافي وعندها خبرة وأكيد تعرف تكتشفه"، وتضيف: "أنا كنت مرتبطة بشخص كل كلامه وعود، لكن من غير تنفيذ، ووقتها حسيت إنه كداب جدًا، وإنه داخل العلاقة يسلي وقته وهيمشي، بعدها اتأكدت إن احساسي ناحيته صح، وأنه شخص غير أمين، وفركشت العلاقة."
وكانت لدى "هاجر" قصة أخرى قالت عنها: "كنت مرتبطة بشخص وعزمني على الغذاء، وبعدها طلب منى أحاسب على الفاتورة، أول مرة حاسبت تحسبًا أنه ممكن يردلي الفلوس أو أنه مش قادر على الدفع، وفي المرة الثانية كلمني قالي عازمك على الغداء ألبسي وأنزلي، وبالفعل لبست ونزلت وبنفس الطريقة كررالموقف، لكن المرة دي وقفت للحظة ورفضت الدفع، بعدها أخدت شنطتي، وقومت رجعت البيت وعملته حظر".
خلافات بالشارع
وروت شيماء العراقي عن الطريقة التي اكتشفت بها أن شريك حياتها لا يحبها قائلة: "ارتبطنا 7 سنين، وكانت فترة كبيرة جدًا، لكن أنا كنت بحبه وكنت منتظرة أننا نتجوز، لكن بعد العمر الطويل دا قالي أنا مش بتاع جواز، وبصراحة أنا ندمت على أيامي وسنيني اللي ضاعت معاه، خاصة إن عمره ما اتكلم معايا عن البيت أو الجواز."
عيد الحب ابتعدي عن الشريك
وتقول "سارة": "كنت مرتبطة بشخص كلم كل صحابي البنات، وكان يحلف أنه بيحبني، وللأسف كملت معاه سنة بنفس الطريقة، لكن بعدها الموضوع اتطورمعاه وبدأ أنه يطلب مني أتكلم مع أي بنت تعجبه، ويتواصل معها تليفونيا بعدها سبته ونهيت العلاقة."
وفي النهاية تقول "آية" عن مواصفات الرجل حين يكون في علاقة لا يحب فيها الطرف الآخر، إنه إذا خاصم فجر، وتحكي تجربتها قائلة: "كان بيغلط فيا ويشتم ويهدد، ودايما يحسسني إني قليلة أو إن هو كتير عليا، وكان دايمًا يختفي من حياتي في لحظات ويرجع بمزاجه، وكنت دايمًا ببكي وهو لا يبالي، وكان كثير الكلام عليا مع أهله وصحابه بطريقة سيئة جدًا، وكان دايمًا يستلف مني فلوس."
