عمرو أديب عن خسارة الزمالك بخماسية: الأهلى انتقم للعام الماضي كله.. ونقلة السولية بمليون جنيه

علق الإعلامي عمرو أديب على خسارة الزمالك من الأهلي بنتيجة 5 – 3 في الجولة الثالثة بالدوري الممتاز، قائلا: "أول مرة في ماتش يجيلي صداع وأحس إن ضغطي عالي.. أول مرة أبقى عايز ماتش يخلص بعد تلت ساعة وحاسس إننا داخلين على مصيبة كروية، أو بالأحرى فضيحة كروية".

أضاف عمرو أديب، في برنامج "الحكاية"، "حسيت إن حياتي بتقع وافتكرت أيام زمان، ولكن حاولت بقدر الإمكان أبلع اللى بيحصل بس ما اتبلعش، وهو بالنسبالي ماكنش ماتش كورة عادي، بصراحة النهاردة الأهلي استطاع أن ينتقم للعام الماضي كله، وكان فيه حظ أهلاوي غير طبيعي من أول هدف وكان فيه شيء غير طبيعي إن الهدف الأول يدخل جول".

وأكمل،"ضربة الجزاء التانية مش ضربة جزاء والهدف الأول للأهلى غير طبيعي لأنها حاجة لن تتكرر إلا بين كل 1 في الـ1000، وفى تحليلي أيضا نقلة السولية اللى لعبها لشريف الحريف بمليون جنيه، والأهلي نجح إنه يلعب شوط سوبر ولكن الشوط التاني لأ، والناس اللى بعتالى النتيجة 5 لا هي 2 صفر، لأن النتيجة 5 – 3، وأنا رأيي إن الماتش ده كمل 5 دقايق كمان كان الزمالك قدر يتعادل".

واسترسل،"أنت اليوم أمام مدرستين في الكورة، الأولى النقل السريع المستمر والتانية نرجع لورا ونطلع لقدام وقاعدين نضرب بلالين، ولكن لعب الأهلي المباشر السريع الأمامي فرق كتير في المباراة، والزمالك لو ماكنش دخل فيه الهدف اللى في الشوط التاني كان ممكن يعمل حاجة أحسن من كده، ولكن هذا لا يمنع أن الأهلى كان أفضل ومنظما أكثر ولعبه إيجابي والأهلى عنده دكة بدلاء مرعبة وواضح إن الأهلى عمل موسم صفقات وحصيلة جيدة".

واختتم: "الماتش كان تقيل جدا علينا وللحظات تخيلنا أن المباراة ستتحول إلى شيء بايخ للزمالك، وبقول لموسيماني وتصريحاته بعد المباراة.. بشويش شوية يا كابتن، أنا أظن إن انت تم تثبيتك بعد الماتش ده في الأهلى، رغم إن جمهور الأهلى لم يرضى عنك، والدنيا يوم ليك ويوم عليك، وأرجوك بشويش كده الزمالك مش فريق صغير، ولازم يبقى فيه تواضع في التصريحات".

وهنأ الإعلامي عمرو أديب النادي الأهلى بالفوز على الزمالك، وتابع:"الحكم عمل ماتش كويس رغم اعتراضى على ركلة الجزاء للأهلى، ومن الحاجات الناجحة في الماتش كان فيه جمهور، وبشكل عام وجود الجمهور بيخلي الماتشات حاجة تانية، ولو كان الماتش 2 صفر للأهلى كان بقى بسيط ولكن الـ5 كانوا كتار، ولو تسأل أي زملكاوي عن مشاعره كانت تقيل جدا الماتش.. مبروك للأهلى إحنا لسه في الأسبوع التالت وممكن مليون حاجة تحصل وأرجو إن الكابتن موسيماني يفرح بس بشويش ويبقى في احترام للخصم".