يرى الإعلامى أحمد شوبير، أن محمد الشناوي حارس مرمى منتخب مصر والنادى الأهلى سوف يتحامل على إصابته للمشاركة مع الفراعنة أمام تونس فى نصف نهائى كأس العرب، وقال شوبير فى برنامجه الإذاعى عبر أون سبورت إف إم: إن محمد الشناوى سوف يتحامل على نفسه للمشاركة أمام تونس وهيتم "لف رجله" طالما مفيش شد قوى وعشان الشناوى مش بيستخدم رجله كتير زى اللاعبية وأتوقع مشاركته أمام تونس بنسبة 95 %.
ويضيف شوبير: "حمدى فتحى أكثر لاعب قطع مسافات جرى فى كأس العرب ، وتعرض للشد فى أكثر من مباراة وتوقعاتى لن يشارك أمام تونس".
وتابع شوبير: "لازم الشناوى وحمدى فتحى يعرفوا أن الشد ممكن يبقى مزق وأن اللاعب طبيب نفسه ولازم الشناوى يعمل فحص طبى مرة وأثنين ولو شعر بألم يعتذر عن المشاركة أمام تونس وكمان الأفضل جهاز الفراعنة اللى يقوله مش هتلعب طالما مش قادر".
وأكمل شوبير:" الشد لو اتحول لمزق هنفقد الشناوى وحمدى فتحى فى السوبر الأفريقى ثم كأس الأمم الأفريقية ، معانا دكتور موهوب اسمه محمد أبو العلا شاطر حقيقى ومعاه فريق طبى على درجة كبيرة من الكفاءة بس لازم اللاعيبة تقول عالطول حاسين بإيه ومحدش يلعب إلا لو سليم بنسبة 100%".
