روى محمد عفيفى زوج الفنانة نجلاء بدر ، بعض المواقف الكوميدية لزوجته الفنانة في المنزل، قائلا: "انا مش هنسى وانتى مربعالي على الكنبة وممصمصة شفايفها وتقولي إنت قصدك إيه يا أخويا ؟ مش فاكر السبب !! بصيت لقيت معايا واحدة رقاصة بلدي في البيت، ولقيتها مرة تانية حاطة وشها فى الأرض ومربعة ، بقولها فيه إيه يا نجلا؟ قالتلي حماتي مسكتني وانا بخون جوزي فى المسلسل".
وردت الفنانة نجلاء على زوجها خلال استضافتها ببرنامج مساء دى إم سي: "أسر ياسين كلمه في التليفون وقاله متنمش النهاردة في البيت علشان مراتك قتلت واحد النهاردة في المسلسل وانا خايف عليك".
ومازح عفيفي زوجته الفنانة قائلا: " آخر مرة شوفتها لابسة بدلة مؤخرا فى أحد الأدوار، ومش متخيلها فى البيت تلبس بدلة نهائي وتخينة، لو عملت كده فعلا هطلقها"، لترد الفنانة:"على فكرة انت من الرجالة اللى هقوم ضدهم بحملة المفروض تستحمل مراتك عيانة تخينة ، لأن انت مش متجوز شكل إنت متجوز بنى آدمة"، فرد ممازحًا: "انا واخدك موديل معين اللى واخد عربية سبور ولذيذة هتقلبي أتوبيس هنزل المحطة اللى جاية ع طول".
وشدد عفيفي على أن زوجته تدعمه في عمله، مضيفا: "مبشوفش نجلا بقالي شهرين ثلاثة، ولقيت نجلا قبل ايفنت شغال عليه راحت المستشفى وساقت وعملت غسيل معدة من تسمم ورجعت تاني ومرضيتش تقولى الا بعد الايفنت".
وعن موضوع الغيرة قال: "كان فيه غيرة كبيرة قوى وبعد كده بتنحسي، كان يعدى عليا واحد ويقولى صورنى مع مراتك، اول مرتين تلاتة كنت هتخانق وبعد كده اتعودت ، لكن يا ريت الذوقيات تعلى عندنا في التعاون ، لكن بعد كده مبقتش أتضايق بسهولة زى الأول".
وقال محمد عفيفى، زوج الفنانة نجلاء بدر، إنه يقيمها كفنانة رائعة بنسبة "10 / 10"، مردفا: "نجلاء بتعمل تشكيلة كبيرة قوى في الفترة اللى فاتت من الأدوار، وتابع: "أنا داعم لنجلاء بدر بشكل كبير، وهى تستاهل أكثر من ده بكثير منى، ولازم أكون داعم لنجاحها كرجل بشكل كبير، ولازم يكون الدعم ده من الطرفين".
