عشقت رضوى الكروشيه منذ نعومة أظافرها، فكانت أجمل لحظات حياتها عندما تعمل بالخيط الملون والإبرة لتصمم الشالات والمفارش بمختلف تصميماتها، وبعد فترة اتجهت لتصميم" بلوفر" للحيوانات الأليفة سواء قطط أو كلاب ونوعت فى تصميم بلوفر بأكمام وبنصف أكمام وأخرى مزينة بالكرانيش، وفساتين أيضاً، مستخدمة ألوان الكروشيه المبهجة، والتى تساعد الحيوانات على الظهور بشكل مبهج وتزيد من شعورهم بالدفء خلال فصل الشتاء .
الموضوع بدأ مع رضوى بلكلوك لقط
تحدثت رضوى محمد، الطالبة بالسنة الثالثة بكلية الأداب قسم لغة إيطالية، عن تصميمها للملابس الشتوية للحيوانات الأليفة، حيث قالت لـ" اليوم السابع":"أتعلمت الكروشيه من فيديوهات على النت، ومع الوقت قدرت أطور من شغلى وعملت أول حاجة شال لماما في عيد ميلادها، وبعد فترة صاحبتى طلبت منى أعمل لكلوك لقطتها فأقترحت عليها تصميم بلوفر، عجبتها الفكرة ونفذتها وبعدين كتير من صحابى طلبوا منى بلوفرات لحيواناتهم، و ده شجعنى إنى أنشر صور لشغلى على جروب بموقع الفيس بوك، والحمد لله شغلى عجب الناس، وطلبوا منى أعملهم بلوفرات لكلابهم وقططهم".
وعن كواليس تصميم البلوفر للكلاب والقطط، قالت رضوى :" القطط من عمر سنة لأكثر، مقاسها واحد، لكن الكلاب مقاساتها بتختلف حسب نوعها وعمرها، عشان كده بطلب من العميل ياخد مقاس الكلب بخيط، ويقيس دوران الرقبة والطول، ومن خلال المقاس بصمم البلوفر، ومعظم العملاء بيحددوا الألوان اللى عايزينها أو يسيبونى أصمم على ذوقى، أو يشوفوا التصميمات الموجودة عندى".
تحرص رضوى على تصميم ملابس شتوية مختلفة للكلاب والقطط بخيوط الكروشيه، حيث قالت :" بصمم بلوفرات بكرانيش وبأستيك وبأكمام أو نصف أكمام وفساتين ".
تواجه رضوى بعض الصعوبات خلال عملها والتي تحدثت عنها قائلة :"الصعوبات اللى بتقابلنى فى تصميم البلوفر، إنه بياخد وقت طويل ومجهود وكمان بلاقى صعوبة فى التوفيق بينه وبين مذاكرتى".
تحلم رضوى بأن تصميماتها تنتشر في معظم أنحاء الجمهورية، حيث قالت :"بحلم يبقى ليا براند لملابس الكلاب و القطط من الكروشيه ويبقى عندى معارض خاصة بشغلى".
تصميمات أخرى لرضوى
تصميمات رضوى
قط
قطة ببلوفر من تصميم رضوى
قطة
كلب
مجموعة من التصميمات
