فاتن موسى لتلفزيون اليوم السابع: لبسى عمره ما كان خارج ومصطفى كان عامل سى السيد.. فيديو

"بعد اللى عمله معايا أكيد مكنش بيحبنى زى ما أنا حبيته، أنا حبيته بقلبى ولغيت عقلى من حياتى، أنا أكتر من 6 سنين، وأنا معاه بشكل كامل كان حبيبى كان كل دنيتى، لكن هو غدر بى وشهر بى"، هكذا قالت الإعلامية فاتن موسى، طليقة الفنان مصطفى فهمى، خلال حوارها مع تلفزيون اليوم السابع .

مؤكدة عدم صدق رواية الفنان مصطفى فهمى، حول الخلافات بينهما، لذلك كان الطلاق بالنسبة لها مفاجأة، خاصة، وإن العلاقة بينهما لآخر الوقت لم يكن بها شيء.

وأضافت الإعلامية فاتن موسى، " هو بيقول طلقتها فى لبنان عشان تكون وسط أهلها ، يا شهمتك اد إيه انت شهم ، إنت معترف انى أنا فوق الـ 6 سنين وأنا معاك مش شايفة غيرك ، وكنت متفرغة ليك 24 ساعة ، وبعدت عن الشغل ، ومع ذلك اللى انت عملته معايا ده خيانة ، لأن الغدر خيانة.

وتابعت "هو بيخوض فيا دلوقت ، وبيتكلم عنى ،  طب ازاى كان عايش مع واحدة بيشك فيها"، وعن الخلافات بينهما بسبب اللبس قالت "أنا أصلا محافظة ومن عيلة محافظة أكتر من مصطفى كالتزام، أنا بحترم نفسى وجسدى وعيلتى واتربيت إنى احترم جوزى، مالبستش أى حاجة خارجة، هو كان بيغير غيرة عامية عليا ويتهمنى انى بغير عليه، صحيح كنت بغير بس غيرة مش  مرضية، هو مثلا في القاهرة مكنش يرضى انى البس فستان، وكنت راضية مع انى لبسى مكنش خارج ".

وأضافت فاتن موسى "هو كان عامل سى السيد عندى وبره متحرر على الاخر، كان في محيطه وأصحابه شيئ، وسي السيد طالع عليا بس، هو ابتدى يختلق مشاكل لما ابتديت اسأله على مسئولياته لأن الحياة مش كلها لعب وسهر".