روت الإعلامية فاتن موسى طليقة الفنان مصطفى فهمى تفاصيل الأيام الأخيرة قبل وقوع الطلاق، وقالت خلال لقاءها مع تلفزيون اليوم السابع، "هو بيقول اننا اتخانقنا عشان لغيت السفر لما كنت مسافرة لأهلى عشان فرح اختى، وقال إنى صوتى على وهو صوته على وقامت خناقة، لكن الكلام ده محصلش، أنا عملت تأكيد السفر قدامه وودعته، وهو ودعنى بشكل طبيعى، وسافرت، وكلم أهلى واعتذر عن عدم حضوره، ويوم خطبة أختى بعتلها رسالة، وأختى ردت عليه، وكان فيه حوار بينهم، هل ده وضع حد بيطلق حد، مكنش فيه أى شيئ ده قمة الغدر".
وتابعت، "بعد الخطوبة بـ 6 أيام صحيت لقيت رسائل من المحامية الخاصة لمصطفى فهمى، بتقولى فيها، أنه طلقنى، مستوعبتش، ومسكت التليفون فورا وفضلت أكلمه بكل الوسائل، لكن هو مردش".
وأضافت "رايحة أزور أهلى بعد سنة ماشفتهمش، وأحضر فرح أختى الصغيرة، وبعدها بكام يوم أقوم على خبر زى كده، والمحامية بتقولى هنأكد على الصحافة عشان بيسألوا، ليه مش عارفة، وليه مستعجل يبلغ الصحافة".
وعن أخر مكالمة بينهما، قالت "كان عادى جدا وطبيعى ومقلش أى حاجة، وراح فورا ينشر الخبر على السوشيال ميديا، مدنيش فرصة حتى استوعب الزلزال اللى أنا فيه ، ليه بتنشر على السوشيال ميديا ليه عايز الترند ، ليه نزلت بيان ، ليه همك تنزل بيان قبل ما نقعد مع بعض ليه الإهانة ليه التشهير ، هذا هو التشهير، أنال كل فعل عملته كان رد فعل على التشهير اللى عمله ، ليه جريت على السوشيال ميديا ، ازاى هانت العشرة".
ووجهت الإعلامية فاتن موسى رسالة لمصطفى فهمى من خلال تلفزيون اليوم السابع، وقالت "رسالتى ليك، أنت أكبر صدمة في حياتى، واللى حصلى بسببك وحصل لعيلتى لا يوصف، حاربتنى وتستقوى عليا، أنا منستش الأيام الحلوة، أعطينى حقوقى بسلام ومش عايزة أشوف وشك تانى، واتخطى الموضوع بتحضر واشتغل وعيش".
