"أسماء" صممت تورتة بتنور وتجسد أجواء الاحتفال برأس السنة الجديدة.. صور

تحدثت أسماء عطية، الحاصلة على بكالوريوس خدمة إجتماعية، عن تحضيرها لحلوى رأس السنة، حيث قالت: "اشتغلت فترة فى مجال التنمية البشرية لمدة 8 سنين، لما ربنا رزقنى بتوأم قعدت فى البيت ومع الوقت، فكرت أعمل مشروع من البيت يساعدنى أقدر أخد بالى من بناتى، وكنت كل مناسبة أعمل حلويات وكانت بتعجب ناس كتير من صحابى وعيلتى، اللى كانوا بيشجعونى إنى أخد خطوة وأعمل مشروع عمل حلويات من البيت، وقررت أنفذ مشروعى وبدأت أجرب حلويات فى البيت لمناسبات عائلية، وأصوره وأنشره على صفحتى على الفيس بوك، وعجب الناس وبدأوا يطلبوا منى تورت، ومع الوقت بدأت أطور شغلى وأعمل تورت مجسمة صعبة ".

تورتة قلبها بينور

تابعت: "فكرت أعمل تورتة مختلفة فى رأس السنة، ونفذت تورتة مجوفة من الداخل ثابتة ودى خدت منى 3 أيام تجهيز، وعملت تورتة  منورة على شكل بيت، عشان أبسط بناتى ودى خدت منى يومين من رسم لبيت على ورق وتنفيذه وزخرفته وعجبت ناس كتير أوى من أصدقائى وعيلتى ومتابعينى على الفيس بوك".

تواجه أسماء بعض الصعوبات فى عملها والتى تحدثت عنها قائلة:"الصعوبات اللى بتواجهنى فى شغلى، إنى لحد دلوقتى مقدرتش أحصل على عائد مادى كبير من مشروعى لأن الفلوس كلها بطور بيها شغلى، وبشترى الخامات اللى بكون محتاجها وأيام كتير مش بيكون فيه شغلى بيخلينى أحس بالإحباط لكن بعد كده الدنيا بتتعدل والحال بيمشى ".

يشترى البعض من أسماء الحلوى كهدية من بنت لخطيبها أو زوجة لزوجها، وللاحتفال بالمناسبات المختلفة، ومن ناحية أخرى تسعى أسماء لتطوير الحلوى حتى تنول إعجاب الأخرين، وعن أمنيتها التى تحلم بتحقيقها قالت :"نفسى فى المستقبل أطور مشروعى ويكبر وأساعد الناس إنهم يعملوا المشروع ده من بيوتهم ويكون ليا ماركة معروفة، وأنصح كل ست بتعمل مشروعى من البيت، إنها تصبر وتسعى لحد ما تحقق حلمها".

تصميم أخر

تصميم أسماء

تورتة مجسمة

تورتة من صنع أسماء