ياسمين عبد العزيز لـ"منى الشاذلى": ساعة واحدة كانت فارقة بينى وبين الموت.. الناس كلها دعت لى يوم عرفة وربنا استجاب.. طلقونى وموتونى على السوشيال ميديا.. وعمرى ماتصورت أتكلم عن مرضى فى برنامج

ياسمين عبد العزيز: كنت فى شبه غيبوبة ومن شدة الآلام تمنيت الموت

ياسمين عبد العزيز: قبل العملية بأسبوع استلمت رسالة من التربى بيجهز لى القبر

ياسمين عبد العزيز: طلعت من العملية شوفت الأمعاء برة بطنى.. ومش بخاف من الموت

ياسمين عبد العزيز: كنت رايحة لربنا لوحدى.. وفكرت أنا عملى كان كويس ولا لأ

ياسمين عبد العزيز: لن أقاضى الطبيب سبب أزمتى الصحية.. أكيد مش قاصد

ياسمين عبد العزيز: خلال مرضى قرأت على السوشيال ميديا أخبار طلاقى ووفاتى

ياسمين عبد العزيز: أجريت أول عملية وعمرى 16 سنة وخمس عمليات "محدش عرف عنى حاجة"

ياسمين عبد العزيز باكية: الأطباء قالوا لو لم أجرِ العملية بعد ساعة كنت هموت

ياسمين عبد العزيز: لم أعش يوما جيدا منذ نجاح مسلسل "اللى ملوش كبير"

ياسمين عبد العزيز: 3 حاجات مش بالفلوس.. الصحة وحب الناس والاحترام
 

استضافت الإعلامية منى الشاذلى الفنانة ياسمين عبد العزيز، التى تظهر للمرة الأولى مع زوجها الفنان أحمد العوضى، مساء الأربعاء، فى برنامج "معكم"، على قناة cbc.

وقالت منى الشاذلى فى تقديم ياسمين عبد العزيز إن خبر إيداعها العناية المركزة أحدث فيضا من الدعوات من ملايين فى الوطن العربى: "ربنا ينجيكِ يا ياسمين" لأن لها رصيد من المحبة فى قلوب الناس، وتحول الإنترنت إلى دفتر دعاء. ولأول مرة تتكلم ياسمين عبد العزيز عن كواليس فترة مرضها.

واستقبل جمهور الحلقة ياسمين عبد العزيز بالتصفيق الحار، وقالت فى بداية حديثها: "مكنتش عارفة إن فى يوم هطلع فى برنامج أتكلم فى حاجة زى كدة، كنت داخلة أعمل عملية بسيطة جدا ومش أول مرة أعملها، عملتها 5 مرات، وكنت أعملها وأمشى على طول وأروح شغلى ومحدش يعرف حاجة".

وأضافت ياسمين عبد العزيز : "كان الدكتور بيقولى إزاى تستحملى الوجع ده إنتى بطلة، وأنا بطبعى مش شكّاية، روحت أعمل العملية، قلت للدكتور العملية هتاخد قد إيه، قال ساعتين أو تلاتة، كان معايا أحمد وابنتى وصاحبتى، دخلت عملت العملية وكان فيه عملية أخرى فى نفس الوقت، يعنى فى شهرين عملت 4 عمليات، دكتور التجميل بيجمل بطنى، طلعت من العملية بألم رهيب جدا وبصرخ وأقول أنا بموت".

وتابعت: "فيه تفاصيل أنا مش فاكراها، من كتر ما كانوا بيدونى مسكنات ومخدر، البعض اعتقد إنى بدلع، بعد كام يوم الدكاترة قالوا لو مدخلتش أعمل عملية بعد ساعة هموت، حدث ثقب فى القولون وتسمم فى الدم، دخلت العمليات وكنت حاسة إنى مش هطلع".

واستكملت ياسمين عبد العزيز باكية: "وأنا داخلة قلت لأخويا الكبير خلى بالك من ياسمين وسيف أولادى.. كنت حاسة إنى هموت، ولما دخلت كانت حالتى صعبة، طلعونى من العملية على العناية المركزة". 

وقالت ياسمين عبد العزيز خلال الحلقة: "حد قال لأخويا هي دخلت على الجهاز ده، اللى بيدخل عليه مابيطلعش.. من بداية أول عملية حتى العناية المركزة كنت فى شبه غيبوبة، وكل ما أنام فى العناية المركزة ييجي نفس الكابوس، وقررت إنى مش هنام ومش هغمض عينى، وأنا عمرى ما جالى كوابيس، وفيه وقت ما فى العناية قلت لهم: "أنا مش قادرة أكمل شيلوا الأجهزة والأدوية.. أنا هبقى مرتاحة لو رحت لربنا".

وروت ياسمين عبد العزيز في الجزء الأول من اللقاء تفاصيل محنتها الصحية التي مرت بها مؤخرا، وكيف ساءت حالتها نتيجة خطأ طبي بعد خضوعها لجراحة نسائية، حيث وصفت شعورها في ذلك التوقيت باقتراب محقق من الموت من شدة الألم، كما تكشف عن أسباب عدم مقاضاتها للطاقم الطبي الذي تسبب في مرضها حتى الآن.

وقالت ياسمين عبد العزيز: "فى يوم عرفة بعد العملية الأخيرة العوضى نشر "بوست" وطلب من الناس الدعاء، بس كنت أول مرة أحس الإحساس ده إنى خلاص هموت، وخسيت 15 كيلو، كله بيدخل يعيط ويقول لى خلاص هتسبينا، لغاية يوم عرفة الناس كلها دعيت لى وربنا استجاب، وبعد يوم عرفة بقيت إنسانة تانية.. طلعت من العناية ودخلت غرفة عادية، وردت فيا الروح.. أنا واحدة كنت بموت وربنا رد فيا الروح".

وقالت ياسمين عبد العزيز: "قبل ما أدخل العملية بأسبوع جت لى رسالة من التربى وعمره ما بعت لى رسالة قبل كدة.. أنا بتعامل مع الترب على إنها بيتى الثانى.. والتربى بعتلى فيديو بيجهزولى التربة".

وأضافت ياسمين عبد العزيز خلال الحلقة: "بعدما عملت العملية طلعت الغرفة وبدأت أتكلم وأستعيد وعيى، ببص لقيت الأمعاء برة بطنى"، مضيفة: "أنا مبخافش من الموت بالعكس هو أحسن من الحياة اللى بنعيشها دلوقتى.. بس كل اللى شاغلنى ولادى".

وأكدت ياسمين خلال الحلقة: "وأنا بحس إنى خلاص هموت، نسيت كل اللى حواليا وفكرت إنى رايحة لربنا لوحدى، وسألت نفسى: أنا عملت إيه فى اللى فات، هو أنا كنت كويسة؟ وشريط كل اللى فات جه فى دماغى".

وأضافت ياسمين عبد العزيز: "كل اللى حواليا كانوا بيقولولى الدنيا مقلوبة، وبشكر كل الناس ومديونة لكل الجمهور وزمايلى فى كل مكان.. أنا بجد متشكرة جدا".

وقالت ياسمين عبد العزيز خلال الحلقة: "وأنا تعبانة قلت هرفع قضية على الدكتور، بعدما خفيت فكرت وقلت: الدكتور ده هو اللى ولدنى فى بنتى.. ربنا سترها معايا بعد ما كنت هموت.. واللى حصل كان فيه سبب وحكمة.. عشان كدة ماينفعش أروح أرفع قضية.. أكيد مش قاصد"، مضيفة: "بدأت أمسك التليفون بعدما استعدت وعيى.. وقرأت أخبار طلاقى وموتى وقالوا عملت عملية تجميل".

وأضافت ياسمين عبد العزيز: "فى سويسرا عملت عملية، ودخلوا الأمعاء فى بطنى من جديد.. مكنتش عايز حد يشوفنى تعبانة.. سافرت بنتى معايا فى البداية، وبعد كدة أحمد العوضى جالى".

وتابعت ياسمين عبد العزيز: "درجة حرارتى كانت كل شوية 39، مش بتنزل ومش بتحسن، قلت لهم سفرونى، وصممت على السفر، وعملت العملية.. لو مكنتش سافرت كنت هموت".

وعن السوشيال ميديا قالت النجمة ياسمين عبد العزيز إنها طلقتها وكذلك أطلقت عليها شائعة وفاتها، موضحة أنها لم تتصور يوما أنها ستتحدث عن مرضها في برنامج تليفزيونى.

وأضافت الفنانة ياسمين عبد العزيز، خلال برنامج معكم، المذاع على قناة سى بى سى تقديم الإعلامية منى الشاذلى: "في وقت وأنا فى العناية المركزة كنت خلاص قلت لهم أنا مش قادرة أكمل وفعلا أنا مكنتش قادرة أكمل".

وتابعت الفنانة ياسمين عبد العزيز: "وصلت لمرحلة من التعب قلت لهم شيلوا المضاد الحيوى وأنا عندى تسمم في الدم قلت لهم شيلوا كل حاجة، ومش هقدر آخد أدوية أنا تعبانة، وأنا هبقى مرتاحة إنى أروح لربنا هكون مرتاحة أكتر".

وقالت الفنانة ياسمين عبد العزيز إن أول عملية أجرتها كان عمرها 16 سنة، كما أجرت خمس عمليات، معلقة: "محدش عرف عنى حاجة"، متابعة: "أنا في العناية المركزة كنت خلاص اللى بيدخلوا يعرفون إني خلاص بروح والدكاترة يقولون للى محيطين بى ادعولها احنا هنعيش اليوم بيومه".

وأضافت ياسمين عبد العزيز، خلال برنامج معكم، المذاع على قناة سى بى سى تقديم الإعلامية منى الشاذلى: "الجهاز اللى دخلت عليه في العناية المركزة لو 100 بيخشوا عليه يطلع 10، ولو 10 بيدخلوا بيخرج 2 أو 3"، متابعة: "بعد ما خفيت حد قالى إن حد قاله فى المستشفى هى دخلت على الجهاز اللى بيدخل عليه مبيطلعش".

وتابعت ياسمين عبد العزيز: "خلال تواجدى في العناية المركزة نبضات قلبى مرتفعة وتلوث في الدم، ومن أول العملية الأولانية حتى العناية المركزة أنا كنت في شبه غيبوبة ولا أفتكر أي شيء، ولكن هناك وقت كنت ولا بتكلم ولا بمشى ولا باكل ولا بجلس، ومكنتش بعرف أتكلم، وصريخى كان جايب لآخر المستشفى".

وبكت الفنانة ياسمين عبد العزيز، خلال شرحها تفاصيل مرضها، قائلة: "أنا إنسانة لما بتوجع أوى بكون بتوجع بالفعل فأنا ست حمولة، وكام يوم وجاء الأطباء وقالوا لو لم تجر العملية كمان ساعة هي هتموتى، فلو مدخلتش كمان ساعة أجرى العملية هموت، ولا يمكن عمل فتح في نفس المكان وطلع إن القولون اتخرم وحدث لى تسمم في الدم منذ 3 أيام وأنا بموت".

وأضافت ياسمين عبد العزيز، خلال برنامج معكم، المذاع على قناة سى بى سى تقديم الإعلامية منى الشاذلى: "الأطباء جريوا بيا والدكتور الذى أجرى لى العملية وأنقذ حياتى الدكتور عمرو شلباية قابلته لما رجع من السفر قال لى أنا كنت داخل أجرى العملية وأنتى لا تتخيلى الدنيا كانت عاملة إزاى، وزى ما فيه ناس وحشة فيه ناس كويسة، وهذا الدكتور أنقذ حياتى، وقال لى الموضوع كان صعبا للغاية، وقال لى أنا داخل وعارف إن الدنيا بايظة خالص وإنك خلاص هتموتى، وأنا داخلة العملية كنت عارفة إنى مش هطلع وكنت أشعر بذلك".

وتابعت ياسمين عبد العزيز: "أنا داخلة العملية قلت لأخى خلى بالك من ياسمين وسيف لأنى كنت فعلا كنت داخلة ومش طالعة وكنت حاسة بده ولما دخلت كانت حالتى رايحة خالص وطلعونى من العملية على العناية المركزة وفى العناية المركزة خراطيم من أنفى ومن فمى و8 خراطيم في بطنى 4 في كل جانب، وإيدى كلها مزرقة وكل هذا متوصل بأدوية مضاد حيوى".

وقالت الفنانة ياسمين عبد العزيز إنه منذ النجاح الكبير لمسلسل "اللى ملهوش كبير"، وهى لم تشهد يوما جيدا على الإطلاق، متابعة: "أصبت بكورونا مرتين وبعدها مباشرة حدثت لى الأزمة الصحية، وده شيء بتاع ربنا".

وأضافت الفنانة ياسمين عبد العزيز، خلال برنامج معكم، المذاع على قناة سى بى سى تقديم منى الشاذلى، أنها أجرت عمليات في مصر وخارجها، وهو ما أصبح شيئا معتادا بالنسبة لها، مضيفة: "والألم بقى صاحبى وكانوا بيقولولى إزاى بتستحملي المرض، وأقول لهم: اتعودت عليه"، مشيرة إلى أنها ليست كثيرة الشكوى، وعندما تشتكى فهذا يعنى أنها مريضة جدا.

وكشفت الفنانة ياسمين عبد العزيز تفاصيل إجراء العملية، حيث أخبرها الطبيب بأنها تستغرق ثلاث ساعات، وستبقى في المستشفى ثلاثة أيام، فأجرت العملية، وكان يرافقها صديقتها وزوجها وابنتها.

وقالت ياسمين عبد العزيز خلال الحلقة: " 3حاجات مابتشتريش بالفلوس، الصحة والاحترام وحب الناس"، مضيفة: شفت معدتي برة جسمى.. وأحمد العوضى حط رأسه على رأسى وكان بيعيط".

وتخللت حلقة معكم، الذى تقدمها الإعلامية منى الشاذلى، مع الفنانة ياسمين عبد العزيز، بكاء من جانب الفنانة ياسمين عبد العزيز، وكذلك الإعلامية منى الشاذلى. وقالت: "كفاية عياط بقى أنا ست فرفوشة واللى حصل حصل. وتابعت: المكياج باظ، دينا اللى عملتلى المكياج هتزعل أوى".