47 معركة هو ملخص عمره الذى لم يتخطى الـ 13 عاما عاشها فى عمليات وغرف عناية مركزة وكيماوى وألم وانتهت ببتر قدمه وتركيب طرف صناعى، أيام وسنين قضاها فى ألم رغم صغره سنه وطفولته التى لم يعيشها بشكل طبيعى لكن رغم كل ذلك يلقبونه بالبطل الفارس، واجه التنمر بالقوة والألم بالصبر والمعاناة بالبطولة، فهو الطفل محمود سامح محارب السرطان وبطل الفروسية بقدم صناعية .
قضى "اليوم السابع" يوما كاملا فى حياة البطل محمود سامح، ليسمع من أسرته حكايته وكيف استطاع أن يجذب الكثيرين له ويحول محنته لمنحة وقوة وبطولة، قالت والدته لـ "اليوم السابع"، محمود قوى وأنا ووالده دايما فى ضهره وبنقويه، الحكاية بدأت وهو عنده 5 سنين كان بيعانى من ألم شديد فى قدمه روحنا المستشفى والدكاترة كانت دايما تكتب له أدوية مسكنة ومضادات للالتهاب ومضاد حيوى ولكن الألم مستمر، وبعد إجراء الفحوصات والإشعات قالولنا عنده ورم سرطانى فى العظم، كانت لحظة صعبة علينا كلنا وصدمة كبيرة مكناش متوقعين إنه يكون سرطان، ومن هنا بدأنا رحلة من العلاج".
وتابعت، "الدكاترة قالولنا لازم يروح مستشفى السرطان ويتابع عشان يبدأ ياخد الكيماوى والعلاج، كانوا بيقولونا نعمل بتر للقدم بس انا كنت برفض وكتير كنت بحاول بالعمليات والأدوية لغاية ما وصل إنه عمل 47 عملية لغاية دلوقتى وهو عمره صغير، كل دى محاولات عشان ميعملش البتر بس فى الآخر ولقدر ربنا إننا كان لازم نعمل بتر وبعد إقناع الدكاترة عملناه وكانت لحظة صعبة لما دخلت لقيت ابنى من غير قدم ".
وأضافت "حاولت أقاوم وأبدأ من جديد عشان ابنى ميتأثرش وخصوصا إنه لسه صغير ومركب طرف صناعى وده كان مسبب له مشاكل فى الأول، الناس كانت بتتنمر عليه وتقوله أبو رجل ونص واللى يقوله يا أبو رجل حديد بس هو كان قوى وكان بيوريلهم رجله وهو مش خايف أو مكسوف".
"محمود تقريبا الطفل الوحيد اللى بيتمرن فروسية وعامل بتر فى القدم"، هو ما قالته والدة محمود عن فترة انتقاله وتحويل المحنة لمنحة فى الفروسية حيث قالت، محمود كان بيتفرج مرة على الانستجرام وشاف أحمد السقا على الحصان وطلب منى إنه يتدرب فروسية عشان يبقى زى أحمد السقا وان حابب الفروسية والحصان مكنتش أعرف إن فيه أماكن ممكن تدرب فروسية بس سألت ووديته فعلا يتدرب".
وتابعت" أول ما وديته الكابتن قالى محمود هيبقى حاجة كبيرة جدا مكنتش مصدقة بس هو كان مؤمن بيه وشجعه ودلوقتى محمود واخد شهادات تقدير فى الفروسية وبقى ينط حواجز وده مستوى كويس جدا وان شاء الله يشارك فى مسابقات وياخد بطولات ، وهفضل وراه لغاية ما يبقى حاجة كبيرة جدا ومش بس على مستوى مصر لكن على مستوى العالم كله".
وانهت حديثها لـ "اليوم السابع"، أتمنى محدش يتنمر على حد ولا يجرحه، محمود شاف كلام كتير وحش من الناس بسبب القدم الصناعية والبتر بلاش نجرح أطفال وياريت نخلى بالنا من كلامنا ".
