قالت الإعلامية لميس الحديدى، متأثرة فى يوم الاحتفال بعيد الأم: "لازم أقول لأمى شكرا، مش عارفة ليه لما أتكلم فى الموضوع دا بعيط بس لازم أتماسك، ولما أسأل مين سبب شخصيتك أو قوتك زى ما ناس كتيرة بيشوفوها، دائما بقول أبويا، لكن لما بفكر أجد أمى أقوى كثيرا، رغم أن والدى شخصية قوية، ولكن فى حقيقته شخص قلوق جدا، لكن أمى كانت دائما هى سند الطمأنينة في بيتنا، وتلاقيها هادئة وسريعة التصرف فى صمت والهلع مش أسلوبها، وتعلمت دا منها".
وأضافت خلال تقديمها برنامج "كلمة أخيرة"، على فضائية "ON": "احنا كنا أسرة عادية ومحصلناش زلازل، الزلازل الحقيقية كانت فى حياتى أنا لما كبرت واشتغلت، وأيام تهديدات الإخوان بالاغتيالات وأيام التحقيقات معانا بالساعات، وأمى كانت السند وعمرها ما قالتلى أنا خايفة عليكى وبعد كل حلقة والحمد لله لغاية دلوقتى هي أمى، تقولى دا كويس ودا وحش، وبعد كل حلقة فى زمن الإخوان تقولى شاطرة ومتخافيش، ومعرفش كانت بتجيب القوة والشجاعة دى منين، عمرها ما زرعت فيا الخوف ودا كان بيقوينى".
وتابعت: "تعرضت لتجربة مُرة، يمكن في يوم من الأيام يكون عندي شجاعة أتكلم عنها وخلال التجربة عمرى ما شوفتها منهارة، وقالت لى بعد كده كانت بتعيط لوحدها، وتدعى ربنا أن ربنا ينجينى، ومتأكدة ربنا نجانى من حاجات كتيرة عشان دعاكى يا أمى، دا غير الشائعات، احنا أسرة محافظة عادية، فجأة بقت أم لميس الحديدى هى الفنانة ناهد شريف، والمشكلة أمى مش ناهد شريف، وفى شغلنا مننفيش كلام لا يليق أننا ننفيه، وقت لها القصة وصلت أنكم لقيتونى على باب جامع وطنشى".
وأردفت: "الفنانة رجاء الجداوى كانت لما تشوفها تقول لها إزيك يا مدام ناهد، بتهزر معاها يعني، وحب الأم قوة مش ضعف، مش بس حضن وطبطبة وسهر الليالى، والطبيخ، - فشلت في الطبيخ ولسه ماشية بالكراسة من ساعة ما اتجوزت – حب الأم قوة وصبر وتحفيز وتشجيع ورعاية ومبادئ، وهى بتعلمك الصلاة والصوم والصدق والخير والحق، وأنك متغشش، - عمرى ما كنت بغش فى الامتحان أو أغشش حد – والحاجات دى بتعلمهالك أمك".
واستكملت: "جدتى كان لها جزء كبير في تربيتى، أمى اتجوزت في ثانوية عامة وكانت كتير أقعد عند جدتى، ودا اللى بحاول أعمله مع ابنى نور، أمى لها فضل كبير عليا في تربية نور، وهنا ننتقل لفكرة أم الطفل الواحد، وقصة أنك لازم تجيبى طفل تانى، وأنا مش قادرة، ولو مرة واحدة مرحتش اجتماع آباء، مفيش اجتماع مروحتوش، أو عيد ميلاد حد من أصحابه، وأنا مرحتش عشان بشتغل".
وأردفت: "لو حد سألنى أهم نجاح فى حياتك وأهم حاجة حققتيها بكل ثقة بقول "نور ابنى" لو كل الأضواء راحت والناس كلها نسيتنى ومحدش افتكر أى حاجة لى هتفضل حاجة واحدة محفورة أنى "أم نور" ودا أحلى لقب بحبه".
