صدر حديثًا عن دار النخبة كتاب جديد تحت عنوان "وصايا عجيبة وقواعد غريبة" لخبير التنمية البشرية سيد الفقى، ويقدم المؤلف مجموعة من الوصايا التى يحتاج إليها كل إنسان لكى يحيا مطمئنًا هادئ النفس وتؤهله للوصول إلى آماله وأحلامه.
يقول المؤلف فى مقدمة الكتاب:
أقدم لكم يا أصدقائي، ويا صديقاتي، هذه الوصايا المهمة، الجميلة، والغريبة… وكذلك القواعد التى كان يعيش بها وعليها رائد التنمية البشرية د. إبراهيم الفقي، أخي، وابني، وصديقى الغالي، رحمه الله.
جولة داخل "وصايا عجيبة وقواعد غريبة":
رحلة الإنسان:
رحلة صعبة منذ البداية… مشاكل فى الرضاعة… مشاكل فى الأمراض فى سن صغيرة… خوف من كل شيء… ثم تبدأ رحلة الحياة…
الطفل يبدأ بالتطعيم… حقن كتير… ويبكي… الطفل يبدأ الشقاوة والعفرتة… أهله يضربوه… معاناة… يبدأ التعليم والمدارس… شغلانة صعبة… منيلة بنيلة… واحنا صغيرين كل يوم نحلم أن المدرسة اتهدت… جالها زلزال… اتحرقت، بس للأسف مابيحصلش… ابتدائي… إعدادي… ثانوي… جامعة… إيه العذاب ده يا ربي!!
الدكتور هيمه يقولك اللى بعده!!
إذا كان خيرًا… يبقى الخير اللى بعده!
وإذا كان شرًّا… يبقى الخير اللى بعده!
يقولك دايمًا: دور على الخير وحطه فى دماغك… حط أهدافك فى سن صغيرة… وقسمها درجات… طلعها واحدة واحدة… عشان ماتقعش وتتكعبل!!
المشاكل… والندالة
مشاكل الحياة كثيرة منذ الصغر مرة تسقط… مرة عايز دروس، وبابا معهوش… مرة تمرض… مرة عايز هدوم، وبابا غلبان… مرة ماما عيانة… بابا عيان… إخواتى أندال… بابا مات… ماما ماتت… البلد حصل فيها زلزال… البلد حصل فيها ضرب… حاجات كتير… وبلاوى ما لها حد اللى بعده… تفائلوا بالخير تجدوه!
رحلة الزواج والعمل
بعد ذلك يا أصحابى تبدأ رحلة الزواج والعمل، وما أدراك البلاوى والنذالة من الناس، بل من أقرب الناس!!
هنا يقولك… اللى بعده… هو ده القانون عديها يا راجل… مشيها يا معلم…
طيب، أعمل إيه يا جدعان؟! أروح لمين، وأقول يا مين؟!
