"يا بنى الشغل مش عيب، العيب إن الإنسان مننا يمد إيده لغيره عشان ياكل، أنا عمري عدى الـ70 سنة لكن لسه بجري وبعافر مع الدنيا عشان لقمة العيش، ومن 50 سنة وأنا واقفة علي عربية الفول ومبسوطة وراضية، وزى ما بيقولوا كدا نفسي أموت وتراب السكة علي رجلي"، بهذه الكلمات المعبرة عن الرضا والكفاح بدأت الحاجة رئيسة تروى لنا تفاصيل حكايتها مع عربية الفول.
وقالت الحاجة رئيسة، لـ"اليوم السابع"، "من وأنا عندى 20 سنة اتجوزت وكنت بقف مع جوزى الله يرحمه ببيع معاه وأساعده علي عربية الفول وربنا رزقنا بـ3 أولاد وربيناهم من عرقنا".
وأكملت الحاجة رئيسة كلامها "الشغل مش عيب وكل يوم من 50 سنة وأنا بقوم الفجر أصلي فرض ربنا وبعدها أسوي الفول وأجهز السلطة والباذنحان وكل ما نحتاجه لزوم السندوتشات وأذهب إلي عربية الفول وأنضفها وأفرش وأبدأ أستقبل الزبائن، وكل حاجة بعملها بأيدى وبعد وفاة زوجى وانا متحملة المسئولية لوحدى وبتوكل على ربنا وبيرزقنى ويراضينى".
وأضافت، "الحياة عاوزة اللي يشتغل ويعافر مش اللي يقعد في البيت ويستنى الرزق يخبط علي بابه وهو قاعد، لازم نسعي ونشتغل، وبنصح الشباب محدش يقعد الشغل كتير وأهم حاجة الرضا باللي ربنا بيرزق به، ونفسي أكمل حياتى لآخر يوم فيها وأنا بشتغل وبعافر، وبتمنى ربنا يكرمنى بعمرة قبل ما أموت".
