كشفت الفنانة الكبيرة ميمى جمال تفاصيل وأسرار الحياة في بيت حضرة الناظر الفنان الكبير حسن مصطفى وأخر وصاياه، وتحدثت النجمة الكبيرة خلال حوارها لتلفزيون اليوم السابع الذى قام بزيارة منزل الفنانة ميمى جمال، والذى جمعها برفيق عمرها وشريك حياتها الفنان الكبير حسن مصطفى عن قصة تعارفهما وزواجهما وتفاصيل الحياة بينهما وأخر وصايا زوجها الفنان الكبير.
كما تحدثت الفنانة الجميلة خلال حوارها لبرنامج حكايات زينب، عن تفاصيل مشوارها الفنى الذى امتد لأكثر من 60 عاماً وبدأته وهى طفلة فى عمر 9 سنوات، وعن قرارها بالابتعاد بعد مرض ووفاة زوجها الفنان الكبير حسن مصطفى .
![ميمى-جمال-(1) ميمى-جمال-(1)](https://img.youm7.com/ArticleImgs/2021/6/16/106888-ميمى-جمال-(1).jpg)
وقالت الفنانة الكبيرة ميمى جمال لـ"اليوم السابع": لما جوزى مرض وتوفى حسيت فى لحظة إنى توهت، كأنى قاعدة على كرسى ومرتاحة وفجأة حد شد ضهر الكرسى فبقيت فى الهوا".
وارتجف صوتها وهى تتحدث عن شريك حياتها وحب عمرها : هو الراجل الوحيد فى حياتى، متجوزين من سنة 66، كان ليا الأخ والأب والزوج والحبيب والسند، وشايل عنى مسئولية كل حاجة وعارف عنى كل حاجة، كنا نبص لبعض كل واحد يفهم التانى عاوز يقول ايه، عشرة طويلة وفجأة راح ولما ملقتهوش تعبت نفسياً وحسيت بزلزال هزنى ومقدرتش أشتغل".
![ميمى-جمال-(2) ميمى-جمال-(2)](https://img.youm7.com/ArticleImgs/2021/6/16/72359-ميمى-جمال-(2).jpg)
وتحدثت عن التغير الذى أصابها بعد وفاة زوجها الفنان حسن مصطفى قائلة:"بعد وفاة حسن بفترة بعتلى الأستاذ أحمد الإبيارى مسرحية وقال لى إخرجى من أحزانك واشتغلى، المسرحية كانت كوميدية ولما حضرت البروفة لقيت جوايا حزن ومفيش ضحك مقدرتش أطلع الضحكة، وحسيت إنى مش هقدر أخدم البطل اللى معايا وأسنده زى ما سمير غانم الله يرحمه كان دايماً يقول ميمى دى العمود اللى واقف قدامى".
وبحزن وانكسار قالت :" حسيت إنى مش قادرة أسند حد، وإنى تعبانة ومش لاقية السند اللى كان بيقوينى فرجعت العربون واعتذرت، وبعد فترة اتعرض عليا فيلم لف ودوران مع أحمد حلمى، ولقيته فيلم خفيف ودورى أم ومش كوميدى أوى والفيلم فيه سفر فقلت أحاول أخرج من أحزانى، وبعد الفيلم الدنيا قفلت معايا وقعدت 5 سنين مشتغلتش، حسيت إن تعب السنين حل عليا وإنى مدتش ولادى وحفادى حقهم لأنى كنت طول الوقت بشتغل، ووالدتى هى اللى اهتمت بولادى، فقلت كفاية أعيش مع ولادى وأحفادى الشوية اللى فاضلين".
![ميمى-جمال-(3) ميمى-جمال-(3)](https://img.youm7.com/ArticleImgs/2021/6/16/79455-ميمى-جمال-(3).jpg)
وحين سألناها عن حب الجمهور واشتياقه :"لما قعدت قدام الكاميرا حسيت إن ده مكانى اللى عشت فيه طول عمرى وقلت لو قبل رمضان اتعرض عليا حاجة حلوة ممكن".
وتحدثت النجمة الكبيرة عن ذكرياتها مع عمالقة الفن ونجومه قائلة : اشتغلت مع الكبار ومع كل نجوم الكوميديا مارى منيب وعبدالمنعم مدبولى وفؤاد المهندس وعادل إمام وسمير غانم ومحمد نجم وحسن عابدين ومحمد عوض وأمين الهنيدى وغيرهم كتير" واسترجعت قصة دخولها مجال التمثيل وهى طفلة فى عمر 9 سنوات وعن أول ظهور لها خلال فيلم أقوى من الحب عام 1953.
![ميمى-جمال-(4) ميمى-جمال-(4)](https://img.youm7.com/ArticleImgs/2021/6/16/78488-ميمى-جمال-(4).jpg)
وقالت النجمة الكبيرة خلال برنامج حكايات زينب: " أنا من مواليد جزيرة بدران بشبرا ودرست فى مدرسة فرنساوى وكانت زميلتى فى الفصل بنت الأستاذ عبدالله بركات وكان مساعد للمخرج الكبير عز الدين ذو الفقار وكان بيدور على بنت جديدة تمثل وتنفع لدور جاد فى فيلم "أقوى من الحب" وزميلتى قالت لوالدها إن فى بنت فى فصلها بتقلد وتمثل، فطلبنى أروح أقابل الأستاذ عز الدين".
وتحدثت الفنانة الكبيرة ميمى جمال عن أول مرة تقف أمام الكاميرا وأمام هؤلاء الفنانين العمالقة الذين شاركتهم الفيلم فقالت :"أول مرة طبعا اتخضيت لأنى كنت واقفة قدام مديحة يسرى وعماد حمدى وشادية، صحيح كنت فرحانة لكن أول ما دخلت البلاتوه خفت وحسيت برهبة وأنا داخلة على الفنانة الكبيرة مديحة يسرى وكانت تقوم بدور والدتى وكنت بترعش، واستاذ عز الدين ذو الفقار قال لى: ده مشهد مهم، فقلت له أنا مذاكرة وحافظة الكلام، فقال: مش مهم الكلام المهم تدخلى مش بتترعشى".
![ميمى-جمال-(5) ميمى-جمال-(5)](https://img.youm7.com/ArticleImgs/2021/6/16/69411-ميمى-جمال-(5).jpg)
وتابعت الفنانة الكبيرة وهى تضحك عندما تذكرت هذا الموقف:" قلت له طيب أعمل بروفة، فقال ورينى، و فى البروفة كنت وحشة أوى، قامت مديحة يسرى نادتنى وأخدتنى على رجلها وقالت لى انتى بنتى وخايفة عليا، فقلت لها أه أنا جاية علشان أقولك زعلانة ليه بابا ساب البيت ومشى وانتى السبب وانتى هتضربينى بالقلم وأنا خايفة قالتلى متخافيش وفعلا عملت المشهد وخدت القلم وعيطت وجريت ، وبعدها شاركت فى فيلم مع الفنان كمال الشناوى وزهرة العلا.
"
وضحكت الفنانة الكبيرة ميمى جمال وهى تتذكر بدايات المشوار :" بعد ما كبرت شوية شاركت الفنان الكبير كمال الشناوى فى مسرحية فى الكويت وكان وقتها متزوج من الفنانة ناهد شريف واحنا فى الطيارة نادانى وقاللى عارفة لو جيتى قدام مدام ناهد وقولتيلى فاكر يا استاذ كمال لما مثلت معاك وأنا صغيرة مش هيحصل لك طيب، إياك تقولى إنك اشتغلتى معايا وانتى طفلة وإنى مثلت دور أبوكى، أنا مش عايز المنظر ده فقلت له: طبعا ياأستاذ مش هقول".
![ميمى-جمال-(6) ميمى-جمال-(6)](https://img.youm7.com/ArticleImgs/2021/6/16/51662-ميمى-جمال-(6).jpg)
وتابعت ضاحكة :" نظموا حفلة بعد المسرحية والاستاذ كمال كان بيقول كلمة فقال ميمى دى اشتغلت معايا وهى صغيرة، فقلت له مش انت يا أستاذ قلت لى متقوليش" .
وبحب شديد امتزج بحزن كبير تحدثت الفنانة الكبيرة ميمى جمال عن تفاصيل رحلة العمر والحب مع شريك حياتها الفنان الكبير حسن مصطفى.
![ميمى-جمال-(7) ميمى-جمال-(7)](https://img.youm7.com/ArticleImgs/2021/6/16/53016-ميمى-جمال-(7).jpg)
وقالت النجمة القديرة :"عرفنا بعض وتزوجنا فى فرق التلفزيون، كان متزوج قبلى من أم ابنته الكبرى سمية ولم يستمر معها، وكنا نتحدث كثيراً ولفت نظرى بطيبة قلبه، وصرح لى بحبه وطلبنى للزواج ووافقت، وتزوجنا عام 1966 يوم عيد ميلاده 26 يونيو".
وتابعت بحزن قائلة :" مش عارفة أقول المرحوم لسه حاسة إنه موجود فى البيت كان بالنسبة لى أب و أخ وزميل وصديق وحبيب وزوج وكل حاجة فى حياتى، كنت معتمدة ومسنودة عليه وكان عارف عنى كل حاجة وبعتمد عليه فى كل شيئ".
![ميمى-جمال-(8) ميمى-جمال-(8)](https://img.youm7.com/ArticleImgs/2021/6/16/81970-ميمى-جمال-(8).jpg)
وتابعت:"أنجبنا توأمنا نجلاء ونورا، ووالدتى وجدتى اهتموا بولادى و لولاهم مكنتش اشتغلت، وعشت أنا وحسن فى البيت والشغل مع بعض فى كل حاجة أكثر من 40 سنة ، وكان نعم الزوج والأب، طيب وحنون جدا".
وأوضحت الفنانة الكبيرة خلال الحوار تفاصيل الحياة داخل منزل حضرة الناظر الفنان حسن مصطفى والذى كان موجهاً بوزارة التربية والتعليم ووصل لمنصب وكيل وزارة، وهل كان في بيته يشبه أحد الشخصيات التى قدمها ، وأقرب أصدقائه.
![ميمى-جمال-(9) ميمى-جمال-(9)](https://img.youm7.com/ArticleImgs/2021/6/16/43498-ميمى-جمال-(9).jpg)
كما كشفت تفاصيل علاقة رمضان السكرى بمجموعة مدرسة المشاغبين وأقربهم إلى نفسه وسر نجاح زواجهما الذى امتد من عام 1966 وحتى وفاة الفنان الكبير عام 2015 ، وأخر وصاياه قبل الرحيل.
وقدم "اليوم السابع" درع تكريم وباقة ورد للنجمة الجميلة ميمى جمال تقديراً لمشوارها الفنى الكبير.
![ميمى-جمال-(10) ميمى-جمال-(10)](https://img.youm7.com/ArticleImgs/2021/6/16/83256-ميمى-جمال-(10).jpg)
![ميمى-جمال-(11) ميمى-جمال-(11)](https://img.youm7.com/ArticleImgs/2021/6/16/78325-ميمى-جمال-(11).jpg)
![ميمى-جمال-(12) ميمى-جمال-(12)](https://img.youm7.com/ArticleImgs/2021/6/16/80415-ميمى-جمال-(12).jpg)
![ميمى-جمال-(13) ميمى-جمال-(13)](https://img.youm7.com/ArticleImgs/2021/6/16/49335-ميمى-جمال-(13).jpg)
![ميمى-جمال-(14) ميمى-جمال-(14)](https://img.youm7.com/ArticleImgs/2021/6/16/83249-ميمى-جمال-(14).jpg)
![ميمى-جمال-(15) ميمى-جمال-(15)](https://img.youm7.com/ArticleImgs/2021/6/16/69908-ميمى-جمال-(15).jpg)
![ميمى-جمال-(16) ميمى-جمال-(16)](https://img.youm7.com/ArticleImgs/2021/6/16/49580-ميمى-جمال-(16).jpg)
![ميمى-جمال-(17) ميمى-جمال-(17)](https://img.youm7.com/ArticleImgs/2021/6/16/53985-ميمى-جمال-(17).jpg)
![ميمى-جمال-(18) ميمى-جمال-(18)](https://img.youm7.com/ArticleImgs/2021/6/16/94028-ميمى-جمال-(18).jpg)
تم أضافة تعليقك سوف يظهر بعد المراجعة